Сурхондарёда мактаб ўқувчилари орасида жиҳод ва ҳижрат ғояларини тарғиб қилган шахсларга суд ҳукми ўқилди

Халқаро терроризм тарафдорлари узоқ муддатга озодликдан маҳрум этилди, деб хабар бермоқда ЎзА.

Қайд этилишича, Давлат хавфсизлик хизмати Сурхондарё вилояти бошқармаси, вилоят Миллий гвардия ва Ички ишлар бошқармаси ҳамкорликда тезкор тадбир ўтказган. Унда Термиз шаҳри ҳудудида жойлашган масжидлар атрофида жиҳод ва ҳижрат ғояларини тарғиб қилиб, келгусида Сурия ва Фаластин давлатларидаги қуролли тўқнашувларда иштирок этишни режалаштирган шахсларнинг жиноий фаолиятига чек қўйилган.

Жиноий гуруҳнинг асосий етакчилари бўлган Ғ.Б. ва Н.Т. фуқароларни, айниқса, вояга етмаган мактаб ўқувчиларини диний экстремизм ва терроризмга фаол даъват қилиб келган.

Термиз шаҳрида истиқомат қилувчи ушбу шахслар 2021 йилнинг 15 июнь санасида қўлга олинган. Уларга нисбатан Жиноят Кодексининг тегишли моддалари билан жиноят иши қўзғатилиб, тергов ҳаракатлари олиб борилган.

Ғ.Б. Жиноят кодексининг 159-моддаси 1-қисми (конституциявий тузумига тажовуз қилиш), 244-1-моддаси (жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) 3-қисми «г» банди, 244-2-моддаси (диний экстремистик, сепаратистик, фундаменталистик ёки бошқа тақиқланган ташкилотлар тузиш, уларга раҳбарлик қилиш, уларда иштирок этиш) 2-қисми «б» банди билан айбдор деб топилиб, 15 йил 6 ой муддатга қамалган. Н.Т. эса Жиноят кодексининг 244-2-моддаси 2-қисми «б» банди билан айбдор деб топилиб, 15 йил муддатга озодликдан маҳрум этилган.