Hujumchi Mario Balotelli Italiya terma jamoasiga qaytadi.
Insayder Fabritsio Romanoga ko‘ra, Italiya milliy terma jamoasi bosh murabbiyi Roberto Manchini Turkiyaning “Adana Demirspor” klubi futbolchisini yanvar oyidagi yig‘inga jalb etadi. Hujumchining terma jamoaga chaqirilishi haqida tez orada rasman e’lon qilinadi.
Qayd etish kerak, Balotelli va Manchini “Inter” hamda “Manchester Siti”da ham birga ishlagan.
31 yoshli Mario 2018-yilning sentabridan beri Italiya terma jamoasida o‘ynamaydi. U terma jamoa safida 36 o‘yin o‘tkazib, 14 ta golga mualliflik qilgan.
Balotelli 2021-yildan beri “Adana Demirspor” sharafini himoya qilib kelmoqda. 2021/22-yilgi mavsumda u barcha musobaqalar doirasida 20 ta o‘yinda maydonga tushib, 8 ta gol va 4 ta golli uzatmani o‘z hisobiga yozdirib qo‘ydi.
Eslatib o‘tamiz, Italiya terma jamoasi JCh—2022 saralashi Yevropa mintaqasida C guruhida Shveysariyadan keyin 2-o‘rinni egalladi. Endilikda jamoa o‘tish o‘yinlarida qatnashadi.
Izoh (0)