Марио Балотелли 4 йиллик танаффусдан кейин Италия терма жамоасига қайтиши мумкин

Ҳужумчи Марио Балотелли Италия терма жамоасига қайтади.

Инсайдер Фабрицио Романога кўра, Италия миллий терма жамоаси бош мураббийи Роберто Манчини Туркиянинг «Адана Демирспор» клуби футболчисини январь ойидаги йиғинга жалб этади. Ҳужумчининг терма жамоага чақирилиши ҳақида тез орада расман эълон қилинади.

Қайд этиш керак, Балотелли ва Манчини «Интер» ҳамда «Манчестер Сити»да ҳам бирга ишлаган.

31 ёшли Марио 2018 йилнинг сентябридан бери Италия терма жамоасида ўйнамайди. У терма жамоа сафида 36 ўйин ўтказиб, 14 та голга муаллифлик қилган.

Балотелли 2021 йилдан бери «Адана Демирспор» шарафини ҳимоя қилиб келмоқда. 2021/22 йилги мавсумда у барча мусобақалар доирасида 20 та ўйинда майдонга тушиб, 8 та гол ва 4 та голли узатмани ўз ҳисобига ёздириб қўйди.

Эслатиб ўтамиз, Италия терма жамоаси ЖЧ—2022 саралаши Европа минтақасида C гуруҳида Швейцариядан кейин 2-ўринни эгаллади. Эндиликда жамоа ўтиш ўйинларида қатнашади.