Bayden AQShda koronavirus sabab boshqa lokdaunlar bo‘lmasligini va’da qildi

AQSh prezidenti Jo Bayden COVID-19 tufayli boshqa lokdaunlar kutilmayotgani, maktablarni yopish rejada yo‘qligini aytdi. Uning so‘zlariga ko‘ra, mamlakatda koronavirusga qarshi kurashish uchun barcha vositalar mavjud.

“Bizda biznes va maktablarni yopmaslik, hayotni saqlab qolish uchun zarur vositalar: vaksinalar, buster dozalar, niqoblar, testlar, dorilar mavjud”, — dedi Bayden AQSh prezidenti sifatida ish boshlaganiga bir yil bo‘lgani munosabati bilan o‘tkazgan matbuot anjumanida.

Uning so‘zlariga ko‘ra, ayni damda AQShda aholining 75 foizi emlangan. Vaksina olmaganlar o‘tgan yozda 90 million edi, bugun esa ular 35 million, deya ta’kidladi Bayden.

1,5 soatdan ortiq davom etgan matbuot anjumanida Bayden, shuningdek, Rossiya Ukrainaga hujum qilsa, uni “iqtisodiy falokat” kutayotgani haqida gapirdi.

Bundan tashqari Bayden AQShdagi 2024-yilgi prezidentlik saylovlarida amaldagi vitse-prezident Kamala Xarris bilan ishtirok etmoqchiligini ma’lum qildi.

Keyinroq AQSh sobiq prezidenti Donald Tramp Baydenning matbuot anjumanida o‘zini tutishini tanqid qildi.

“Baydenning jurnalistlarga ro‘yxat bo‘yicha murojaat qilishi, faqat yengil savollar olishi va javoblarni o‘qib berishini qanday qabul qilish mumkin” — deya g‘azablangan Tramp.

Trampning aytishicha, u bunday qilmagan bo‘lardi va uning bunday qilishiga imkon ham berilmasdi.