Braziliyada yangi turdagi koronavirus infeksiyasiga qarshi emlangan 10 yoshli bolaning yuragi to‘xtab qoldi. Bu haqda Lensoys-Paulista (San-Paulu shtati) shahri ma’muriyatiga tayanib, “TASS” xabar berdi.
“10 yoshli yigitchaning yuragi bolalar uchun mo‘ljallangan Pfizer vaksinasini olganidan so‘ng to‘xtab qoldi”, — deyiladi mahalliy hukumat bayonotida. Ta’kidlanishicha, reanimatsiya muolajalaridan so‘ng, bola o‘ziga kelgan, hozirda uning ahvoli barqaror bo‘lib, shifokorlar nazorati ostida qolmoqda. Shahar meriyasning qayd etishicha, bola astmadan aziyat chekkan.
Sodir bo‘lgan voqea sabab shahar rasmiylari bolalarni koronavirusga qarshi emlashni yetti kun muddatga to‘xtatish bo‘yicha qaror qabul qilgan. Bu vaqt davomida COVID-19 ga qarshi emlagan shu yoshdagi 46 nafar bola kuzatuvda bo‘ladi. Kattalar va o‘smirlarni emlash ishlari odatdagi rejimda davom etadi. Vaksinatsiya jarayonlari qayta tiklanishini kutmasdan farzandini baribir emlashni istaganlar ro‘yxatga oldindan yozilib qo‘yishlari mumkinligi aytilmoqda.
16-dekabr kuni Milliy sanitariya nazorati agentligi Amerikaning Pfizer kompaniyasiga tegishli koronavirusga qarshi vaksinani 5 yoshdan 11 yoshgacha bo‘lgan bolalarda ham qo‘llashni ma’qullagandi. Dori vositasining bolalar uchun mo‘ljallangan Comirnaty partiyasi 13-yanvar kuni yetkazib berilgan, shu bilan birga, 12 yoshdan kattalar Pfizer’ning oddiy vaksinasi bilan emlanmoqda. Braziliya Sog‘liqni saqlash vazirligi bolalarni emlashdan oldin jamoatchilik muhokamasini o‘tkazgan va 5-yanvardan boshlab 12 yoshgacha bo‘lgan bolalarni milliy immunizatsiya rejasiga kiritish bo‘yicha qarorini e’lon qilgan.
Braziliya Sog‘liqni saqlash vaziriligi tavsiyasiga ko‘ra, vaksinaning birinchi va ikkinchi dozasi orasidagi muddat ishlab chiqaruvchi aytganidek uch hafta emas, balki sakkiz hafta bo‘lishi kerak. Bu miokardit kabi salbiy oqibatlar yuzaga kelish xavfini kamaytirishga xizmat qiladi.
Avvalroq Isroilda apreldan chaqaloqlarni koronavirusga qarshi emlash boshlangani, Braziliya prezidenti o‘z qizini koronavirusga qarshi emlatishdan bosh tortgani, Avstriya Yevroittifoq mamlakatlaridan birinchi bo‘lib majburiy vaksinatsiyani joriy qilgani to‘g‘risida xabar berilgandi.
Izoh (0)