AQSh Oliy sudi 13-yanvar kuni prezident Jo Baydenning yirik kompaniya xodimlarini majburiy vaksinatsiya va testdan o‘tkazish to‘g‘risidagi farmonini bloklab qo‘ydi, biroq sog‘liqni saqlash sohasidagi ma’lum xodimlarning vaksinatsiyasiga ruxsat bergan, deb yozadi Axios.

Foto: Getty Images

Xususan, AQSh administratsiyasining 100 va undan ortiq xodimlarga ega korxona ishchilarini majburiy vaksinatsiyadan o‘tkazish yoki har hafta PZR-test topshirish borasidagi talabi bloklangan.

Sudyalar Mehnat muhofazasi boshqarmasi (OSHA) 80 milliondan ortiq ishchiga taalluqli bo‘la oladigan talabni chiqarish vakolatiga ega emas deb topgan.

“Kongress OSHA’ga ish bilan bog‘liq xavflarni tartibga solish vakolatini bergan bo‘lsada, u ushbu agentlikka aholi salomatligini yanada kengroq tartibga solish vakolatini bermagan. Shunchaki 100 dan ortiq xodimi bo‘lgan kompaniyalarda ishlagani uchun tanlangan 84 million amerikalikni emlash talabi, albatta, oxirgi toifaga kiradi”, — deyiladi Oliy sud qarorida.

Oliy sud, shuningdek, federal budjet tomonidan moliyalashtiriladigan muassasalardagi tibbiyot xodimlarini vaksinatsiyadan o‘tkazish mandatini qo‘llab-quvvatlagan. Shu bilan birga, AQSh prezidenti Jo Bayden yirik kompaniyalar xodimlarini majburiy emlash bo‘yicha sud qaroridan hafsalasi pir bo‘lganini bildirgan.

“Oliy sud yirik korxonalar xodimlarining hayotini saqlab qolish bo‘yicha ham ilm-fanga, ham qonunga asoslangan sog‘lom fikr talablarini bloklashga qaror qilganidan hafsalam pir bo‘ldi. Ushbu favqulodda standart ish beruvchilarga vaksinatsiyani yoki ishchilarning har hafta test topshirish va ish joyida niqobda bo‘lish sharti bilan emlanishdan bosh tortishiga ruxsat berish imkonini taqdim etardi”, — deyiladi Baydenning bayonotida.

Prezident kompaniyalar vaksina yoki test bo‘yicha o‘z talablarini ixtiyoriy ravishda yaratishi uchun ularga bosim o‘tkazishga va’da bergan.

“Biznes yetakchilarini, xususan, Fortune 100 ro‘yxatidagi kompaniyalarning uchdan bir qismini zudlik bilan oldinga qadam tashlaganlarga qo‘shilishga hamda o‘z xodimlari, mijozlari va jamiyat himoyasi uchun vaksinatsiya talabini joriy etishga chaqiraman”, — deya qo‘shimcha qiladi Bayden.

Oq uy matbuot kotibi Jen Psaki esa tibbiyot xodimlarining majburiy vaksinatsiyasini “yaxshi yangilik” deb atagan.

Eslatib o‘tamiz, 1-noyabr kuni Nyu-York shahrida 10 000 dan ortiq politsiya, o‘t o‘chiruvchilar va boshqa xodimlar shahar merining barcha shahar ishchilarini COVID-19 ga qarshi emlash bo‘yicha topshirig‘iga rioya qilmagani uchun haq to‘lanmaydigan ta’tilga jo‘natilgandi. Nyu-Yorkdagi 2,3 mingga yaqin o‘t o‘chiruvchi emlanishni istamayotgani uchun kasallik ta’tiliga chiqqan. Xodimlar yetishmovchiligi tufayli shahardagi 18 ta o‘t o‘chirish stansiyasi yopilgan.