Австрия Европада биринчи бўлиб вояга етган аҳолининг барчаси учун коронавирусга қарши мажбурий вакцинацияни жорий қилади. Бу ҳақда Euractiv хабар берди.
Қонун лойиҳасининг якуний версиясини тақдим этар экан, мамлакат канцлери Карл Нехаммер қонун 1 февралдан кучга кириши кераклигини айтди.
Парламентда 20 январда қонун лойиҳасига овоз бериш бўлиб ўтади, ўшанда дастлабки, ўтиш босқичи бошланади. Кириш босқичидан сўнг, март ойининг ўрталаридан бошлаб полиция қонуннинг бажарилишини назорат қилади: улар фуқаролардаги эмланганлик ёки эмланишдан тиббий озод қилинганлик тўғрисидаги сертификатларни текширади. Маълум қилинишича, эмланмаганлар 600 евродан 3600 еврогача жаримага тортилади.
Ҳомиладор аёллар ва соғлиғидаги муаммолар сабаб эмлана олмайдиган одамлар вакцинациядан озод қилинади.
Канцлернинг таъкидлашича, бу эмланганларни эмланмаганларга қарши қўйиш эмас, у «вакцинация биргаликда эркин муҳитда яшашнинг энг яхши кафолати» эканини қўшимча қилди.
Ноябрь охирида Австрияда бутун мамлакат бўйлаб локдаун эълон қилинганди. Унга қадар эса фақат эмланмаганлар учун локдаун амалда эди.
Изоҳ (0)