“O‘zgidromet” hafta davomida qanday ob-havo bo‘lishini ma’lum qildi

Respublika Gidrometeorologiya markazi hafta davomida kuzatiladigan ob-havo ma’lumotini e’lon qildi.

Unga ko‘ra, 17—18-yanvar kunlari O‘zbekiston hududi bo‘yicha beqaror ob-havo saqlanib turadi, bunday holat Eron hududlaridan issiq va juda nam havo massalari kirib kelishi bilan bog‘liq. Respublika bo‘yicha ba’zi joylarda yomg‘ir yog‘adi, ba’zi joylarda kuchli bo‘lishi mumkin. Shimolda yog‘ingarchilik (yomg‘ir qorga aylanadi) bo‘ladi. Havo harorati kechasi 3-8 daraja iliq, kunduzi 5-10 daraja iliq, ba’zi joylarda havo ochiq bo‘lganda 12 daraja iliqqacha, shimolda kechasi 3-8 daraja sovuq, kunduzi 3 daraja sovuq 2 daraja iliq atrofida bo‘ladi.

19-yanvar, chorshanba kuni ertalab respublika bo‘yicha yomg‘ir jadalligi pasaya boshlaydi, lekin kunduz kuni sovuq front o‘tishida ayrim hududlarda yomg‘ir qorga aylanishi mumkin. Qoraqalpog‘istonda, Xorazm viloyatida kechasi va ertalab ba’zi joylarda biroz qor yog‘ishi kuzatiladi. Respublika bo‘yicha havo harorati kechasi 3 daraja sovuq 2 daraja iliqqacha, kunduzi 5-8 daraja iliqqacha pasayadi.

21-yanvar, payshanba kuni O‘zbekistonda havo harorati kechasi 3 daraja sovuq 2 daraja iliq, kunduzi 7-10 daraja iliq bo‘lgan quruq va biroz bulutli ob-havo kutilmoqda.

22-yanvar, juma kuni O‘zbekiston hududiga Kaspiy dengizidan biroz nam va nisbatan sovuq havo massasi kirib keladi. Respublika bo‘yicha ba’zi joylarda biroz yomg‘ir yog‘ishi mumkin, shimolda biroz yog‘ingarchilik (yomg‘ir, qor) bo‘ladi. Farg‘ona vodiysi viloyatlarida yog‘ingarchilik kutilmaydi. Havo harorati 0-5 daraja iliq, ba’zi joylarda 2 daraja sovuqqacha, kunduzi 5-10 daraja iliq bo‘ladi.

Respublika bo‘yicha ba’zi joylarga tuman tushishi mumkin.