Ijtimoiy tarmoqlarda Majburiy ijro byurosining Andijon shahar bo‘limi xodimlarlari sud qarorini bajarish evaziga 4 ming dollar pora olgani haqida xabarlar tarqaldi. Byuro matbuot xizmatining “Daryo”ga ma’lum qilishicha, holat yuzasidan jinoyat ishi qo‘zg‘atilgan.
Ma’lum qilinishicha, 14-yanvar kuni fuqaro O.Q.ning arizasiga asosan Andijon viloyat huquqni muhofaza qiluvchi organlar, viloyat prokuraturasi va Majburiy ijro byurosining viloyat boshqarmasi Shaxsiy xavfsizlik bo‘yicha xodimlari tomonidan tezkor tadbir o‘tkazilgan. Tadbir davomida byuroning Andijon shahar bo‘limi ijrochisi F.F. o‘z ish yurituvidagi qarzdor U.X. va boshqalarni majburiy ko‘chirish to‘g‘risidagi ijro hujjatini ijro qilib berish evaziga Andijon tuman bo‘limi davlat ijrochisi I.Q. bilan birga, Andijon shahrining “Vatan” choyxonasi yaqinidagi bekatda fuqaro O.Q.dan 4000 dollar olgan vaqtlarida ashyoviy dalillar ushlangan.
Mazkur holat yuzasidan Andijon viloyat prokuraturasi tomonidan F.F. va I.Q.ga nisbatan Jinoyat kodeksining 210-moddasi (pora olish) 2-qismi “v, g” bandlari bilan jinoyat ishi qo‘zg‘atilgan.
Ta’kidlanishicha, Majburiy ijro byurosi xodimlar o‘rtasida shaxsiy xavfsizlik bo‘yicha tarmoqlar xizmat mavqeyini suiiste’mol qilish va boshqa nojo‘ya xatti-harakatlar sodir etish holatlarining oldini olish hamda bunga imkon bergan shart-sharoitlarga barham berish borasida profilaktik ishlar olib borilmoqda (o‘tgan yilda 3119 ta ana shunday profilaktik tadbirlar o‘tkazilgan). “O‘tgan davrda, xizmat tekshiruvlari natijalariga ko‘ra, qo‘pol qonunbuzilishiga yo‘l qo‘ygan 69 nafar xodim intizomiy jazo tariqasida byuro organlaridan bo‘shatilgan. Birgina, o‘tgan davrda byuroning 24 nafar xodimi tomonidan sodir etilgan jinoyat holatlarining 18 tasi shaxsiy xavfsizlik tarmoq xodimlarining tashabbuslari asosida fosh etilgan”, — deyiladi xabarda.
Avvalroq Buxoroda qarzni undirishga kelgan MIB xodimini kaltaklagan korxona rahbari javobgarlikka tortilgani, Andijonda MIB xodimini pichoq bilan jarohatlagan fuqaro qamoqqa olingani to‘g‘risida xabar berilgandi.
Mavzuga doir:
Izoh (0)