O‘zbekistonning Kuvaytdagi elchixonasi ko‘magida O‘zbekiston Tashqi mehnat migratsiyasi agentligi va Kuvayt ishchi kuchlari bo‘yicha agentligi o‘rtasida onlayn muzokaralar tashkil etildi, deb xabar beradi “Dunyo” agentligi.
Ma’lum qilinishicha, muzokaralar chog‘ida xavfsiz, tartibli va qonuniy mehnat migratsiyasi tashkil etilishiga yo‘naltirilgan hukumatlararo bitim loyihasi ko‘rib chiqilgan. Kuvayt vakillari ko‘p asrlik do‘stlik, o‘zaro ishonch va qo‘llab-quvvatlash tamoyillariga asoslangan ikki tomonlama munosabatlar darajasini yuqori baholar ekan, bu tamoyillar siyosiy, savdo-iqtisodiy va madaniy-gumanitar sohalardagi aloqalarda o‘z aksini topayotganini ta’kidlagan.
“Kuvayt delegatsiyasi rahbari, ayniqsa, so‘nggi yillar davomida Kuvayt agentligi va O‘zbekiston elchixonasi o‘rtasidagi hamkorlik munosabatlari izchil o‘suvchanlik bilan rivojlanib borayotganidan mamnuniyat bildirdi. Diplomatiya vakolatxonasi bilan birgalikda malakali ishchi kuchlarini jalb etish bo‘yicha izchil ish olib borilmoqda, ularning huquq va manfaatlarini himoya qilish mexanizmi yo‘lga qo‘yilgan”, — deyiladi xabarda.
Ta’kidlanishicha, hozirgi paytda Kuvaytda tibbiyot, ta’lim, madaniyat va xizmat ko‘rsatish singari sohalarda 200 nafardan ortiq O‘zbekiston fuqarosi mehnat faoliyatini olib bormoqda. Kuvayt tomoni ularning bilim va malakasi darajasini hisobga olgan holda o‘z mamlakati iqtisodiyotining barcha jabhalarida ishlashi uchun o‘zbek mutaxassislarining sonini bir necha barobarga oshirishdan manfaatdor ekani ma’lum qilingan.
O‘zbekiston tomonidan Tashqi mehnat migratsiyasi agentligi faoliyatining asosiy yo‘nalishlari, jumladan, xalqaro sheriklar bilan hamkorligining taqdimoti o‘tkazilgan.
Muzokaralar yakuni bo‘yicha Mehnat migratsiyasi to‘g‘risidagi hukumatlararo bitimning imzolanishi O‘zbekiston va Kuvayt o‘rtasidagi o‘zaro manfaatli hamkorlikni yanada rivojlantirish hamda ikki mamlakat xalqlari o‘rtasidagi do‘stona aloqalarni rivojlantirishga xizmat qilishi yuzasidan har ikki tomon komil ishonch bildirgan.
Avvalroq Germaniyada o‘zbekistonlik hamshiralarga 2,5 ming dollardan ortiq maoshli ish taklif qilayotgani, Kanada O‘zbekistonda viza markazi ochishni rejalashtirayotgani to‘g‘risida xabar berilgandi.
Izoh (0)