O‘zbekistondan Qozog‘iston shaharlariga parvozlar 15-yanvardan qayta yo‘lga qo‘yiladi

O‘zbekiston shaharlaridan Olmaota, Aqto‘be va Aqtauga parvozlar qayta yo‘lga qo‘yilmoqda, deya xabar qilmoqda Uzbekistan Airways

Qayd etilishicha, 2022-yil 15-yanvardan boshlab, aviakompaniya Toshkent—Olmaota—Toshkent, Samarqand—Olmaota—Samarqand, Nukus—Aqto‘be—Nukus, Urganch—Aqtau—Urganch, Nukus—Aqtau—Nukus, Urganch—Aqtau—Urganch, Nukus—Aqtau—Nukus yo‘nalishlari bo‘yicha muntazam aviaqatnovlarni qayta yo‘lga qo‘yadi.

Ta’kidlanishicha, Olmaota xalqaro aeroporti xalqaro qatnovlarni soat 08:00 dan 21:00 gacha (Olmaota vaqti bilan) qabul qiladi. Ushbu munosabat bilan Toshkent—Olmaota—Toshkent yo‘nalishi bo‘yicha HY–765/766 qatnovi 16-yanvar kuni bekor qilinadi, mazkur parvoz yo‘lovchilari 17-yanvar kuni Toshkent—Olmaota—Toshkent yo‘nalishi bo‘yicha HY–763/764 aviaqatnovi orqali manzilga yetkaziladi.

Olmaota va Aqto‘be, Aqtau shaharlarida bekor qilingan (2022-yil 7-dan 13-yanvarga qadar) qatnovlar yo‘lovchilari aviachiptaning to‘liq qiymatini xarid qilingan joyda qaytarib olish yoki istalgan boshqa bo‘sh sanaga bepul qayta bron qilish huquqiga ega.

Eslatib o‘tamiz, Aqtauga muntazam parvozlar 5-yanvar kunidan boshlab bekor qilingandi. Keyinroq Uzbekistan Airways Olmaota va Aqto‘bega rejalashtirilgan parvozlarni ham amalga oshirmadi.