Ўзбекистоннинг Кувайтдаги элчихонаси кўмагида Ўзбекистон Ташқи меҳнат миграцияси агентлиги ва Кувайт ишчи кучлари бўйича агентлиги ўртасида онлайн музокаралар ташкил этилди, деб хабар беради «Дунё» агентлиги.
Маълум қилинишича, музокаралар чоғида хавфсиз, тартибли ва қонуний меҳнат миграцияси ташкил этилишига йўналтирилган ҳукуматлараро битим лойиҳаси кўриб чиқилган. Кувайт вакиллари кўп асрлик дўстлик, ўзаро ишонч ва қўллаб-қувватлаш тамойилларига асосланган икки томонлама муносабатлар даражасини юқори баҳолар экан, бу тамойиллар сиёсий, савдо-иқтисодий ва маданий-гуманитар соҳалардаги алоқаларда ўз аксини топаётганини таъкидлаган.
«Кувайт делегацияси раҳбари, айниқса, сўнгги йиллар давомида Кувайт агентлиги ва Ўзбекистон элчихонаси ўртасидаги ҳамкорлик муносабатлари изчил ўсувчанлик билан ривожланиб бораётганидан мамнуният билдирди. Дипломатия ваколатхонаси билан биргаликда малакали ишчи кучларини жалб этиш бўйича изчил иш олиб борилмоқда, уларнинг ҳуқуқ ва манфаатларини ҳимоя қилиш механизми йўлга қўйилган», — дейилади хабарда.
Таъкидланишича, ҳозирги пайтда Кувайтда тиббиёт, таълим, маданият ва хизмат кўрсатиш сингари соҳаларда 200 нафардан ортиқ Ўзбекистон фуқароси меҳнат фаолиятини олиб бормоқда. Кувайт томони уларнинг билим ва малакаси даражасини ҳисобга олган ҳолда ўз мамлакати иқтисодиётининг барча жабҳаларида ишлаши учун ўзбек мутахассисларининг сонини бир неча баробарга оширишдан манфаатдор экани маълум қилинган.
Ўзбекистон томонидан Ташқи меҳнат миграцияси агентлиги фаолиятининг асосий йўналишлари, жумладан, халқаро шериклар билан ҳамкорлигининг тақдимоти ўтказилган.
Музокаралар якуни бўйича Меҳнат миграцияси тўғрисидаги ҳукуматлараро битимнинг имзоланиши Ўзбекистон ва Кувайт ўртасидаги ўзаро манфаатли ҳамкорликни янада ривожлантириш ҳамда икки мамлакат халқлари ўртасидаги дўстона алоқаларни ривожлантиришга хизмат қилиши юзасидан ҳар икки томон комил ишонч билдирган.
Аввалроқ Германияда ўзбекистонлик ҳамшираларга 2,5 минг доллардан ортиқ маошли иш таклиф қилаётгани, Канада Ўзбекистонда виза маркази очишни режалаштираётгани тўғрисида хабар берилганди.
Изоҳ (0)