Qashqadaryo viloyati Qarshi shahrida 2021-yil 17-avgust kuni ushu-sanda bo‘yicha jahon chempioni, MMA jangchisi Elbek Rahimov o‘ldirib ketilgandi. 2022-yilning 6-yanvar kuni mazkur ish bo‘yicha boshlangan sud 13-yanvar kuni o‘z ishini davom ettirdi. Bu haqda “Daryo” muxbiri xabar bermoqda.
Qayd etilishicha, navbatdagi sud majlisida marhum sport ustasi Elbek Rahimov o‘limi bo‘yicha ayblanayotgan 26 nafar ayblanuvchining ayblov xulosasi o‘qib eshittirilgan.
“Elbek Rahimovning o‘limidan tashqari, bir guruh shaxslarning boshqa jinoyatlar sodir etgani, qolaversa, shu ishga aloqador boshqa shaxslarga nisbatan ayblov e’lon qilinib, jami 26 nafar shaxsga nisbatan jinoyat ishi qo‘zg‘atilib, sudga yuborilgani bois ushbu shaxslar ishi ko‘rilmoqda. Hali sud davom etayotgani sabab sudlanuvchilarning shaxsini ochiqlay olmaymiz”, — deydi sud jarayonlari haqida gapirgan sud axborot xizmati rahbari Farhod Tilovov.
Qo‘shimcha qilinishicha, mazkur sudgacha bo‘lib o‘tgan tergov jarayonida pora olish, pora berish va jinoyatni hisobga olishni qasddan yashirish, dalillarni soxtalashtirish kabi holatlar ham aniqlangan.
Eslatib o‘tamiz, sport ustasi Elbek Rahimov 17-avgust kuni soat 09:45 da ko‘p qavatli uydagi xonadoni oldida bir guruh shaxslar tomonidan o‘ldirib ketilgan. “Yigitni avvaliga rosa do‘pposlashgan. So‘ngra pichoqlab, yarimjon holatda mashinaga tiqib olib ketishgan. Marhumning jasadi Chiroqchi tumanining Yettitom qishlog‘idan topilgan”, — degan “Daryo” muxbiri bilan suhbatlashgan manba.
Sodir bo‘lgan mudhish qotillik haqida gapirgan voqea guvohlari 102 qisqa raqamlariga xabar berilganidan so‘ng, IIB xodimlari voqea joyiga 40-45 daqiqada yetib kelganini, shu bois qotillikning oldi olinmaganini aytgan. “102 ga shaxsan o‘zim uch marta qo‘ng‘iroq qildim. Xo‘p, ariza qabul qilindi, yozib oldik, deya menga qo‘pollik qilishdi. Ular kelishganda esa, bezori bolalar yigitni yarimjon holatda mashinaga tiqib olib ketishgandi”, — degan guvohlardan biri.
Sudlanuvchilar Jinoyat kodeksining 97 (qasddan odam o‘ldirish), 28,104 (qasddan badanga og‘ir shikast yetkazish), 104, 105 (qasddan badanga o‘rtacha og‘ir shikast yetkazish), 109 (qasddan badanga yengil shikast yetkazish), 127 (voyaga yetmagan shaxsni g‘ayriijtimoiy xatti-harakatlarga jalb qilish), 28,137 (odam o‘g‘irlash), 137, 169 (o‘g‘rilik), 210 (pora olish), 28,211 (pora berish), 230-1 (dalillarni soxtalashtirish (qalbakilashtirish), 238 (yolg‘on guvohlik berish), 241-1 (jinoyat haqida xabar bermaslik yoki uni yashirish), 28,277 (bezorilik) moddalarida nazarda tutilgan jinoyatlarni sodir etganlikda ayblanmoqda.
Izoh (0)