Amerikaning Luiziana shtati Nyu-Orlean shahri yaqinida korroziyaga uchragan Meraux Pipeline quvur liniyasida avariya yuz berdi, oqibatda 1,1 milliondan ortiq dizel yonilg‘isi suvga to‘kildi. Bu haqda Associated Press xabar berdi.
Qayd etilishicha, hodisa ekologik halokatga aylangan — yonilg‘i ikkita sun’iy hovuzga to‘kilgan, ularda yuzlab baliqlar, qushlar va boshqa hayvonlar nobud bo‘lgan.
“To‘kilish oqibatida 2300 ta baliq va 100 dan ortiq boshqa hayvonlar, jumladan, 39 ta ilon, 32 ta qush, bir qancha ilonbaliq va ko‘k qisqichbaqa nobud bo‘ldi”, — deyiladi hududning Yovvoyi tabiat va baliqchilik departamenti xabarida.
Bundan tashqari, yana 72 ta alligator, 23 ta qush, 20 ta ilon va 12 ta toshbaqa ushlanib muolajaga jo‘natilgan.
Xabar qilinishicha, 42 yillik quvurning yorilgan o‘rnida bir yildan ko‘proq vaqt oldin korroziya aniqlangan. Biroq yana bir tekshiruv, go‘yoki korroziya unchalik yomon emasligini ko‘rsatgan va ta’mirlash kechiktirilgan.
Avariyadan so‘ng quvur liniyasi ta’mirlanib, hozirda qayta ishga tushirilgan. Bundan tashqari, mulkdor kompaniya hovuzlardagi yonilg‘ini yig‘ib olish ishlarini olib bordi.
“Taxminan 1,2 million litr dizel yonilg‘isi yig‘ildi bunga to‘kilgan yonilg‘i ham, avariyadan keyin quvur ichida qolgan dizel yonilg‘isi ham kiradi”, — deyiladi kompaniya xabarida.
Avvalroq Kaliforniya sohillari yaqinida katta miqdordagi neft Tinch okeaniga chiqib ketgani haqida xabar qilingandi.
Izoh (0)