Namanganda Nexia kanalga tushib ketdi, Farg‘onada Lacetti velosipedchining hayotiga zomin bo‘ldi. Baxtsiz hodisalar tafsilotlari

O‘zbekiston yo‘llarida sodir bo‘lgan hodisalar tafsilotlarini taqdim etamiz.

Namanganda Nexia kanalga tushib ketdi

Namangan viloyati Uchqo‘rg‘on tumanida 11-yanvar kuni Nexia mashinasi kanalga tushib ketdi. Bu haqda viloyat Favqulodda vaziyatlar boshqarmasi xabar qildi.

Qayd etilishicha, shu kuni tungi soat 01:10 atrofida “Qumto‘g‘on” mahallasida yashovchi fuqaroga tegishli Nexia harakat xavfsizligini ta’minlay olmay, “Tegirmon” mahallasidan oqib o‘tuvchi Andijon kanaliga tushib ketgan.

Favqulodda vaziyatlar boshqarmasi yong‘in qutqaruv otryadining suvda qidiruv-qutqaruv xodimlari tomonidan mashina olib chiqilgan. Holat oqibatida tan jarohati olganlar yo‘q.

Farg‘onada Lacetti velosipedchining o‘limiga sabab bo‘ldi

10-yanvar kuni haydovchi S.Z Lacetti avtomashinasini “Eshonguzar” MFY hududida boshqarib ketayotib, yo‘lning qatnov qismini kesib o‘tayotgan velosipedchi T.K.ni urib yuborgan.

Oqibatda velosipedchi tan jarohati olib, shifoxonada vafot etgan.

Mazkur holat yuzasidan Qo‘shtepa tumani IIB huzuridagi tergov bo‘linmasi tomonidan Jinoyat kodeksining 266-moddasi 2-qismi (odam o‘limiga sabab bo‘lgan transportdan foydalanish xavfsizligi qoidalarini buzish) bilan jinoyat ishi qo‘zg‘atilib, tergov harakatlari davom etmoqda.

Yuk mashinasiga Nexia urilishi oqibatida 2 kishi vafot etdi

11-yanvar kuni Nishon tumani hududidan o‘tgan markaziy avtomobil yo‘lda ayanchli yo‘l-transport hodisasi sodir bo‘lgan. Bu haqda xabar qilgan Nasafnews xabar qildi.

Qayd etilishicha, Nexia yuk mashinasining tirkamasiga urilgan. Voqea oqibatida Nexia’da bo‘lgan 2 nafar fuqaro vafot etgani aytilmoqda. Yana bir fuqaro og‘ir tan jarohati olib shifoxonaga tushgan.

Nexia tiklab bo‘lmas holatga kelib qolgan. YTH yuzasidan hali rasmiy ma’lumot berilmadi.