Наманганда Nexia каналга тушиб кетди, Фарғонада Lacetti велосипедчининг ҳаётига зомин бўлди. Бахтсиз ҳодисалар тафсилотлари

Ўзбекистон йўлларида содир бўлган ҳодисалар тафсилотларини тақдим этамиз.

Наманганда Nexia каналга тушиб кетди

Наманган вилояти Учқўрғон туманида 11 январь куни Nexia машинаси каналга тушиб кетди. Бу ҳақда вилоят Фавқулодда вазиятлар бошқармаси хабар қилди.

Қайд этилишича, шу куни тунги соат 01:10 атрофида «Қумтўғон» маҳалласида яшовчи фуқарога тегишли Nexia ҳаракат хавфсизлигини таъминлай олмай, «Тегирмон» маҳалласидан оқиб ўтувчи Андижон каналига тушиб кетган.

Фавқулодда вазиятлар бошқармаси ёнғин қутқарув отрядининг сувда қидирув-қутқарув ходимлари томонидан машина олиб чиқилган. Ҳолат оқибатида тан жароҳати олганлар йўқ.

Фарғонада Lacetti велосипедчининг ўлимига сабаб бўлди

10 январь куни ҳайдовчи С.З Lacetti автомашинасини «Эшонгузар» МФЙ ҳудудида бошқариб кетаётиб, йўлнинг қатнов қисмини кесиб ўтаётган велосипедчи Т.К.ни уриб юборган.

Оқибатда велосипедчи тан жароҳати олиб, шифохонада вафот этган.

Мазкур ҳолат юзасидан Қўштепа тумани ИИБ ҳузуридаги тергов бўлинмаси томонидан Жиноят кодексининг 266-моддаси 2-қисми (одам ўлимига сабаб бўлган транспортдан фойдаланиш хавфсизлиги қоидаларини бузиш) билан жиноят иши қўзғатилиб, тергов ҳаракатлари давом этмоқда.

Юк машинасига Nexia урилиши оқибатида 2 киши вафот этди

11 январь куни Нишон тумани ҳудудидан ўтган марказий автомобиль йўлда аянчли йўл-транспорт ҳодисаси содир бўлган. Бу ҳақда хабар қилган Nasafnews хабар қилди.

Қайд этилишича, Nexia юк машинасининг тиркамасига урилган. Воқеа оқибатида Nexia’да бўлган 2 нафар фуқаро вафот этгани айтилмоқда. Яна бир фуқаро оғир тан жароҳати олиб шифохонага тушган.

Nexia тиклаб бўлмас ҳолатга келиб қолган. ЙТҲ юзасидан ҳали расмий маълумот берилмади.