O‘zbekistonda oxirgi besh yil mobaynida avtomobillarga o‘rnatilgan ballonlarning portlashi oqibatida 23 nafar fuqaro vafot etgan va 20 nafar fuqaro og‘ir tan jarohatlari olgan. Bu haqda Bug‘ qozonlari, ko‘tarish inshootlari va putur yetkazmaydigan nazoratda sanoat xavfsizligi inspeksiyasi mas’ul xodimi Jamshid Usmonov AOKAda o‘tkazilgan matbuot anjumanida ma’lum qildi.
Ma’lum qilinishicha, hozirgi kunda mamlakatda tadbirkorlik subyektlari tomonidan qurilgan 1200 dan ortiq avtomobillarga gaz to‘ldirish kompressor shoxobchalari (AGTKSh) va 800 dan ortiq avtomobillarga suyultirilgan gaz quyish shoxobchalari (AGQSh) faoliyat ko‘rsatmoqda. Shu bilan birga, gaz ballonlarini ishlab chiqaruvchi bir nechta tashkilot mavjud.
Qo‘mita tomonidan gaz ballonlarini sinovdan o‘tkazish vakolatini beruvchi 150 ta korxona va tashkilotlarga belgilangan tartibda ruxsatnoma berilgan. 2022-yilga qadar 1 million 570 mingdan ortiq avtotransport vositalarida 2,5 milliondan ortiq metan gaz va 200 mingdan ortiq avtotransport vositalarida suyultirilgan gaz yoqilg‘isida ishlashga moslashtirilgan gaz ballonlari o‘rnatilgan.
“Biroq bugungi kunda O‘zbekistonda ba’zi yuridik va jismoniy shaxslar tomonidan sinovdan o‘tkazilmagan gaz ballonlaridan foydalanish holatlari aniqlanmoqda. Ba’zi avtomobillarga gaz to‘ldirish kompressor shoxobchalari tomonidan gaz ballon bilan jihozlangan avtomobillarga me’yoridan ortiq gaz to‘ldirish kabi qonunbuzarlik holatlari qayd qilinmoqda. Buning oqibatida oxirgi besh yil mobaynida avtomobillarga o‘rnatilgan ballonlarining portlashi bilan bog‘liq 3 ta favqulodda vaziyat sodir bo‘lgan. Buning oqibatida 23 nafar fuqaro vafot etgan va 20 nafar fuqaro og‘ir tan jarohatlari olgan”, — deydi Usmonov.
Tahlillarga ko‘ra, avtomobil ballonlarining portlashiga quyidagilar sabab bo‘lmoqda:
- sifatsiz (metallokompozit) ballonlardan foydalanish;
- ballonlarni ishlab chiqarish jarayonida texnologik kamchiliklar;
- avtomobillarga ballonlarni o‘rnatish va sinov ishlarining sifatsizligi;
- avtomobillarga siqilgan gaz quyishda ruxsat etilganidan ortiqcha bosimda gaz quyilishi.
Eslatib o‘tamiz, dekabr boshida Senatning Mudofaa va xavfsizlik masalalari qo‘mitasi O‘zbekistonda 2020—2021-yillarda gaz-ballon o‘rnatilgan 17 ta mashina portlagani haqida axborot bergandi. Ammo “Daryo” ma’lumotlariga ko‘ra, 2021-yil 1-yanvardan to 7-dekabrgacha gaz-ballon o‘rnatilgan avtomobillarning portlashi bilan bog‘liq kamida 16 ta holat OAVda yoritilgan (avgust oyida Namanganning Uchqo‘rg‘on tumanidagi noaniq qolgan holat ham — avval yong‘in chiqib, so‘ng avtomobildagi gaz-ballon portlaganmi yo gaz-ballon portlagach yuz bergach, yong‘in kelib chiqqanmi — hisobga olinsa, 2021-yilning o‘zida 17 ta holat yuz bergan bo‘lib chiqadi).
Izoh (0)