Тиббий ниқоб тақмаган фуқаролар аввал огоҳлантирилади ва ниқоб берилади. Бу ҳақда 10 январь куни АОКАда ўтказилаётган матбуот анжуманида ССВ ҳузуридаги Коронавирусга қарши курашиш штаби аъзоси Ҳабибулла Оқилов маълум қилди, дея хабар бермоқда «Дарё» мухбири.
Таъкидланишича, Коронавирусга қарши кураш бўйича Республика махсус комиссиясининг 9 январь кунги йиғилишида тиббий ниқоб тақмаган фуқароларга фақат огоҳлантириш берилиши айтилган.
«Бош вазир бошчилигида Махсус комиссия йиғилишида ички ишлар, миллий гвардия ходимларига кўчада юрганда муомалани тўғри қилиш тушунтирилди. Ниқобсиз бўлган фуқарога, биринчидан, тушунтириш, огоҳлантириш ва фақатгина огоҳлантириш берилади. Ходимларга ниқобсиз фуқароларга бериш учун керакли миқдорда ниқоблар тарқатилган. Жаримaлар тўғрисида ҳозирча гап йўқ», — деди Ҳабибулла Оқилов.
Мавзуга доир: ССВ: Ўзбекистонга «омикрон» штамми аниқланган фуқаро билан самолётда бирга келганларнинг барчаси карантинга олинган
Санитария-эпидемиологик осойишталик ва жамоат саломатлиги хизмати бошлиғи ўринбосари, тиббиёт фанлари доктори, профессор Нурмат Отабеков «омикрон» бошқа штаммларга қараганда анчагина юқумли ва қисқа муддатда аҳолининг катта қисмини зарарлаши мумкинлигини айтганди.
Шунингдек, эмланмаган ходимлар ишга қўйилмайди. Вазирлик ва идора раҳбарлари, ташкилий шаклидан қатъий назар, барча ташкилотларда ишчиларнинг эмлангандан сўнг иш жойларига киритишга рухсат берилади. Тартибни бузган ташкилот раҳбарларига нисбатан қонун ҳужжатларида белгиланган тартибда қатъий чора кўрилади.
Олий таълим муассасалари талабалари ўртасида таътил давомида коронавирус инфекциясига қарши тўлиқ эмлаш чоралари кўрилади. Ушбу тадбирларга ОТМ раҳбарлари шахсан масъул этиб белгиланади.
«Омикрон» штамми аниқлангани муносабати билан 15 январдан бошлаб мамлакатда бир қатор чекловлар жорий этилади.
Инновацион ривожланиш вазирлиги ҳузуридаги Илғор технологиялар маркази директори Шаҳло Турдиқулова ZF-UZ-VAC 2001 вакцинасининг бустер дозаси «омикрон»дан деярли 100 фоиз ҳимоя қилишини маълум қилди.
Изоҳ (0)