O‘zbekistonga “omikron” shtammi aniqlangan fuqaro bilan samolyotda birga kelgan 200 kishi karantinga olingan. Bu haqda 10-yanvar kuni AOKAda o‘tkazilayotgan matbuot anjumanida Sanitariya-epidemiologik osoyishtalik va jamoat salomatligi xizmati boshlig‘ining birinchi o‘rinbosari aytib o‘tdi, deya xabar bermoqda “Daryo” muxbiri.
“Bemor bilan birga samolyotda kelgan barcha yo‘lovchilar karantinga olingan. O‘zbekiston fuqarolari uy sharoitida, chet el fuqarolari esa mehmonxona sharoitida karantinga olingan”, — dedi Xolmamat Norboyev.
Sog‘liqni saqlash vazirligi matbuot xizmatining aniqlik kiritishicha, O‘zbekistonga bemor bilan samolyotda 200 kishi kelgan. Ularning 130 nafari O‘zbekiston fuqarolari, 70 nafar esa xorijiy fuqarolardir.
Eslatib o‘tamiz, mamlakatga kelgan xorijiy davlat fuqarosidan COVID-19 ning yangi “omikron” shtammi joriy yilning 7-yanvar kuni aniqlangan. Shu sababli barcha tashkilot, korxona va muassasalarda, yirik savdo majmualari, supermarketlar, ko‘ngilochar muassasalarning kirish qismida niqobda bo‘lish, ijtimoiy masofani saqlash, tana haroratini o‘lchash amaliyotiga qat’iy rioya etilishi ta’minlanadi.
Sanitariya-epidemiologik osoyishtalik va jamoat salomatligi xizmati boshlig‘i o‘rinbosari, tibbiyot fanlari doktori, professor Nurmat Otabekov “omikron” boshqa shtammlarga qaraganda anchagina yuqumli va qisqa muddatda aholining katta qismini zararlashi mumkinligini aytgandi.
Shuningdek, emlanmagan xodimlar ishga qo‘yilmaydi. Vazirlik va idora rahbarlari, tashkiliy shaklidan qat’iy nazar, barcha tashkilotlarda ishchilarning emlangandan so‘ng ish joylariga kiritishga ruxsat beriladi. Tartibni buzgan tashkilot rahbarlariga nisbatan qonun hujjatlarida belgilangan tartibda qat’iy chora ko‘riladi.
Oliy ta’lim muassasalari talabalari o‘rtasida ta’til davomida koronavirus infeksiyasiga qarshi to‘liq emlash choralari ko‘riladi. Ushbu tadbirlarga OTM rahbarlari shaxsan mas’ul etib belgilanadi.
“Omikron” shtammi aniqlangani munosabati bilan 15-yanvardan boshlab mamlakatda bir qator cheklovlar joriy etiladi.
Innovatsion rivojlanish vazirligi huzuridagi Ilg‘or texnologiyalar markazi direktori Shahlo Turdiqulova ZF-UZ-VAC 2001 vaksinasining buster dozasi “omikron”dan deyarli 100 foiz himoya qilishini ma’lum qildi.
Izoh (0)