Belarus Bosh prokuraturasi Ikkinchi jahon urushi davrida belarus xalqining genotsidi bo‘yicha 17 ta davlatga huquqiy yordam so‘rab murojaat qildi. Bu haqda prokuraturaning genotsid ishi bo‘yicha tergov guruhi rahbari Valeriy Tolkachevga tayanib, “Interfaks” xabar berdi.
“Tushunamiz, jinoiy ish bo‘yicha tergovga kimdir yordam beradi, kimdir esa yo‘q. Misol tariqasida, afsuski, Litva va Latviyani keltiraman, ular genotsid jinoyatiga oid ish bo‘yicha bizga huquqiy yordam ko‘rsatishdan bosh tortib, bu ularning milliy xavfsizlik masalalariga ta’sir qilishi mumkinligini bildirgan”, — dedi Tolkachev STV telekanalidagi chiqishida. Shu bilan birga, u Rossiya tergovga faol yordam bergani, bu uning arxiv hujjatlari bilan ishlashga yo‘l ochganini eslatdi.
“Davlat rahbarining topshirig‘iga binoan Bosh prokuraturaning tergov guruhi Moskvaga tashrif buyurdi. Biz Rossiya Federatsiyasi davlat arxivi, Mudofaa vazirligi arxivi, boshqa arxivlar bilan ishladik. Rossiya tomoni bizga hujjatlarni taqdim etishdan manfaatdor. Ushbu jinoiy ish bo‘yicha tergovda bizga faol yordam berayotgani uchun ularga minnatdorlik bildirish zarur”, — dedi Tolkachev.
Uning aytishicha, ish bo‘yicha 12,5 mingga yaqin guvoh so‘roq qilingan, ularning yarmi konslager asirlari va Ikkinchi jahon urushi qatnashchilaridir.
Ikkinchi jahon urushi davrida belarus xalqining genotsidga uchragani bo‘yicha jinoiy ish 2021-yilda ochilgan. Belarus bosh prokurori Andrey Shvedga ko‘ra, maqsad mamlakatni genotsid qurboni sifatida tan oldirish, tarixiy faktlarning qadrsizlantirilishiga yo‘l qo‘ymaslik.
Prokuratura ma’lumotlariga ko‘ra, Ikkinchi jahon urushi yillarida Belarusda 400 dan ortiq tinch aholini majburiy hibsda saqlash joylari, 260 ta o‘lim lagerlari va 170 ta gettolar mavjud edi va ularda kamida 1,5 million kishi halok bo‘lgan. Hammasi bo‘lib, so‘nggi ma’lumotlarga ko‘ra, Germaniya istilosi yillarida Belarus tinch aholisidan taxminan 3 million kishi yo‘q qilingan.
2022-yilning boshida mamlakat prezidenti Aleksandr Lukashenko Ikkinchi jahon urushi davrida belarus xalqining genotsidi to‘g‘risidagi qonunni imzoladi. U 1951-yilgacha urush va urushdan keyingi davrda natsist jinoyatchilari va ularning sheriklari tomonidan belarus xalqining genotsidini qonuniy ravishda tan oldirishni nazarda tutadi. Belarus xalqi deganda Belarus Sovet Sotsialistik Respublikasi hududida yashagan barcha sovet fuqarolari tushuniladi. Qonunda Belarus xalqining genotsidini ommaviy ravishda inkor etganlik uchun jinoiy javobgarlik belgilangan.
Izoh (0)