Беларусь Бош прокуратураси Иккинчи жаҳон уруши даврида беларус халқининг геноциди бўйича 17 та давлатга ҳуқуқий ёрдам сўраб мурожаат қилди. Бу ҳақда прокуратуранинг геноцид иши бўйича тергов гуруҳи раҳбари Валерий Толкачевга таяниб, «Интерфакс» хабар берди.
«Тушунамиз, жиноий иш бўйича терговга кимдир ёрдам беради, кимдир эса йўқ. Мисол тариқасида, афсуски, Литва ва Латвияни келтираман, улар геноцид жиноятига оид иш бўйича бизга ҳуқуқий ёрдам кўрсатишдан бош тортиб, бу уларнинг миллий хавфсизлик масалаларига таъсир қилиши мумкинлигини билдирган», — деди Толкачев СTВ телеканалидаги чиқишида. Шу билан бирга, у Россия терговга фаол ёрдам бергани, бу унинг архив ҳужжатлари билан ишлашга йўл очганини эслатди.
«Давлат раҳбарининг топшириғига биноан Бош прокуратуранинг тергов гуруҳи Москвага ташриф буюрди. Биз Россия Федерацияси давлат архиви, Мудофаа вазирлиги архиви, бошқа архивлар билан ишладик. Россия томони бизга ҳужжатларни тақдим этишдан манфаатдор. Ушбу жиноий иш бўйича терговда бизга фаол ёрдам бераётгани учун уларга миннатдорлик билдириш зарур», — деди Толкачев.
Унинг айтишича, иш бўйича 12,5 мингга яқин гувоҳ сўроқ қилинган, уларнинг ярми концлагер асирлари ва Иккинчи жаҳон уруши қатнашчиларидир.
Иккинчи жаҳон уруши даврида беларус халқининг геноцидга учрагани бўйича жиноий иш 2021 йилда очилган. Беларусь бош прокурори Андрей Шведга кўра, мақсад мамлакатни геноцид қурбони сифатида тан олдириш, тарихий фактларнинг қадрсизлантирилишига йўл қўймаслик.
Прокуратура маълумотларига кўра, Иккинчи жаҳон уруши йилларида Беларусда 400 дан ортиқ тинч аҳолини мажбурий ҳибсда сақлаш жойлари, 260 та ўлим лагерлари ва 170 та геттолар мавжуд эди ва уларда камида 1,5 миллион киши ҳалок бўлган. Ҳаммаси бўлиб, сўнгги маълумотларга кўра, Германия истилоси йилларида Беларусь тинч аҳолисидан, тахминан, 3 миллион киши йўқ қилинган.
2022 йилнинг бошида мамлакат президенти Александр Лукашенко Иккинчи жаҳон уруши даврида беларус халқининг геноциди тўғрисидаги қонунни имзолади. У 1951 йилгача уруш ва урушдан кейинги даврда нацист жиноятчилари ва уларнинг шериклари томонидан беларус халқининг геноцидини қонуний равишда тан олдиришни назарда тутади. Беларусь халқи деганда Беларусь Совет Социалистик Республикаси ҳудудида яшаган барча совет фуқаролари тушунилади. Қонунда Беларусь халқининг геноцидини оммавий равишда инкор этганлик учун жиноий жавобгарлик белгиланган.
Изоҳ (0)