Diyor Imomxo‘jayev “Turon” sobiq murabbiyini yosh futbolchini “sindirish”da aybladi. Islom Ismoilov esa PFL direktorining murabbiylarni muhokama qilishga haqqi yo‘q ekanini aytdi

PFL direktori Diyor Imomxo‘jayev “Sports.uz” saytiga bergan intervyusida “Turon” sobiq bosh murabbiyi Islombek Ismoilovning 18 yoshli futbolchiga qilgan munosabati haqida fikr bildirdi.

Ochig‘ini aytaman, ikki murabbiydan xafa bo‘ldim. Biri Islom Ismoilov, ikkinchisi hozirda “Bunyodkor” bilan shartnoma imzolagan “Neftchi” U-18 murabbiyi. Men maydonda ularning o‘zini tutishini o‘z ko‘zim bilan ko‘rdim. Masalan, Islom. Odam bu darajada bo‘lishi kerak emas, qaysi ma’noda, U-21 ning o‘yini (“Turon” jamoasi nazarda tutilyapti) ketyapti, bolalar murabbiyga yoqaman deb o‘ynayapti. U-18 jamoasidan o‘yinchi kelibdi “Turon”ga, u yosh hali, jamoaga kelganidan xursand. Murabbiy o‘yinni boshidan oxirigacha o‘sha bolani haqorat qildi, “Bu qayerdan kelib qolgan o‘zi”, “Basharangga unaqa, bunaqa”, deb. 18 yoshli bola o‘sha yerda sindi.

Biz o‘tiribmiz, boshqalar o‘tiribdi, ko‘p bo‘lmasa ham muxlislar o‘tiribdi. Shuncha odamni oldida u bolani haqorat qilib tashladi. Qanaqa futbolchi bo‘ladi u bola keyin? Kiyim almashtirish xonasida kamar bilan urmaydimi. Qattiqqo‘lligini boshqa joyda qilsin, lekin hammani oldida unday qilmasligi kerak. Lobanovskiylar o‘yin paytida jim o‘tirgan, kiyim almashtirish xonasida esa nimalar qilmagan... Nima bor hammani oldida “publikaga o‘ynab”, u bolaning onasi ham qolmadi, boshqasi ham qolmadi. “Seni qaytib bu yerda ko‘rmay”, dedi. 18 yoshli bola birinchi marta keldi, nima kutyapsan undan. Murabbiylarga omad tilayman, maslahatim, hech qachon o‘z shogirdiga bunday munosabat qilishi kerak emas. Orqadan gapirish bo‘lmasin, o‘ziga ham yetib borsin deb shu fikrni aytyapman.

Diyor Imomxo‘jayev, PFL direktori

Biz murabbiymiz, futbolchilarni qayerdadir so‘kamiz, urishamiz, qayerdadir maqtaymiz. Ularni psixologiyasini akamizdan yaxshi bilsak kerak har holda. Kimgadir yaxshi gap yoqadi, kimgadir qattiqqo‘l munosabat. Qachon ko‘zlari bilan ko‘ribdilarki, bunchalik ishonch bilan gapiribdilar. Diyor Imomxo‘jayev shu fikrlari bilan yana bir marta yaxshi mutaxassis emasligini ko‘rsatib berdi. Shunchalik, aqllari sig‘may ketayotgan bo‘lsa, balchiqqa botib ketgan ligalarini tozalash haqida bosh qotirsalar maqsadga muvofiq bo‘ladi. Buni murabbiylarni muhokama qilishga haqqi yo‘q!Islom Ismoilov

Eslatib o‘tamiz, Islom Ismoilov 2021-yilning mart oyida Superliganing 2-turi doirasida “So‘g‘diyona”ga qarshi kechgan bahsdan so‘ng “o‘yin bermayotgan hakamlar”ga chora ko‘rishni talab qilgandi. May oyida esa Ismoilov o‘z arizasiga ko‘ra “Turon” jamoasidan iste’foga chiqdi.