Manchester uzra qora bulutlar: “Yunayted” futbolchilari Ralf Rangnikka ishonmayapti. Klub yangi murabbiy izlashni boshlab yuborgan

Ralf Rangnik “Manchester Yunayted” boshqaruvida qiyinchiliklarga duch kelmoqda.

Daily Mail xabariga ko‘ra, jamoaning ruhiy holati havas qiladigan darajada emas, futbolchilar bir qancha guruhlarga bo‘linib ketgan, shuningdek, jamoa a’zolarining katta qismi klubni tark etishni istamoqda.

Shu bois mavsumning so‘ngiga qadar bosh murabbiy etib tayinlangan germaniyalik mutaxassis, vaqt kamligi tufayli vaziyatni o‘zgartira olmasligini his qilmoqda. Qolaversa, “Manchester Yunayted” futbolchilari ham uning murabbiylik uslubi va yordamchilarining saviyasiga shubha bilan qaramoqda.

Ushbu xabarlar fonida “Manchester Yunayted”ning yangi murabbiy izlayotgani haqida ma’lumotlar tarqaldi. The Times nashrining yozishicha, “Manchester Yunayted” bosh murabbiylik uchun “Ayaks”ni boshqarayotgan Erik ten Hag variantini ko‘rib chiqmoqda, u nomzodlar ichida favorit ekani aytildi.

Shuningdek, klubning hozirda “PSJ”ni boshqarayotgan Maurisio Pochettinoga bo‘lgan qiziqishi sovigani qo‘shimcha qilingan. Ole-Gunnar Sulsher murabbiylikdan ketganidan keyin Pochettino “Manchester Yunayted”ni boshqarishni xohlagandi, biroq “PSJ” uni qo‘yib yubormagan. Shundan so‘ng Ralf Rangnik vaqtinchalik bosh murabbiy etib tayinlangandi.

“Manchester Yunayted” Rangnik qo‘l ostida umumiy hisobda oltita o‘yin o‘tkazib, bir marta mag‘lubiyatga uchradi.