Qozog‘istonda maktab ta’tillari 17-yanvarga qadar uzaytirildi, kollej va universitet talabalari esa 24-yanvargacha dam oladi. Bu haqda 24kz davlat telekanali efirida ta’lim vazirining birinchi o‘rinbosari Sholpan Karinova ma’lum qildi, deb yozmoqda “Interfaks”.
Vazir o‘rinbosarining qo‘shimcha qilishicha, aksariyat bolalar bog‘chalari mamlakatdagi favqulodda holat va komendantlik soatiga qaramay, odatdagidek ishlashda davom etmoqda.
“Qishki ta’tilda maktab o‘qituvchilari hududdagi sharoitga qarab masofaviy yoki an’anaviy shaklda ishlaydi. Bolalar bog‘chalari ham muayyan hududdagi sharoitga qaraydi. Shu bilan birga, hozirda bog‘chalarning aksariyati bolalarni qabul qilmoqda. Kollej va universitet talabalari uchun ta’til akademik kalendarga muvofiq 24-yanvarda tugaydi”, — deya xabar bergan Qozog‘istonning Tengrinews nashri.
“RIA Novosti”ning Qozog‘iston dipolmatik vakiliga tayanib, xabar berishicha, mamlakat hukumati favqulodda holat e’lon qilingani tufayli xorijiy fuqarolarning Qozog‘istonga kirishini vaqtincha to‘xtatgan.“Favqulodda holat e’lon qilinishi munosabati bilan xorijiy fuqarolarning Qozog‘iston hududiga kirishi vaqtincha to‘xtatildi. Ushbu qoida, jumladan, piyoda, havo va boshqa har qanday transport vositalarida keluvchilarga taalluqli”, — deya qayd etgan diplomatik vakil.
Shu bilan birga, Qozog‘iston Tashqi ishlar vazirligi rasmiy vakili Aybek Smadyarov “Sputnik Qazaxistan” muxbiriga xorijliklarning mamlakatga kirishi to‘xtatilgani haqidagi ma’lumot “haqiqatga to‘g‘ri kelmasligini” aytgan. U boshqa izoh bermagan.
Qozog‘istonda 2-yanvardan beri davom etayotgan ommaviy norozilik namoyishlari fonida butun mamlakat bo‘ylab favqulodda holat e’lon qilingan, mamlakatda 23:00 dan 07:00 gacha komendantlik soati amal qiladi. Bundan tashqari, ommaviy yig‘ilishlar taqiqlangan.
Qozog‘istondagi vaziyat suyultirilgan gaz narxining ikki baravar oshishiga qarshi mitinglar boshlanganidan so‘ng keskinlashdi. Chiqishlar iqtisodiy va siyosiy talablar bilan butun mamlakat bo‘ylab ommaviy norozilik namoyishlariga aylanib ketdi. 4 va 5-yanvar kunlari Olmaotada namoyishchilarning xavfsizlik xodimlari bilan to‘qnashuvi kuzatildi.
5-yanvar kuni Qozog‘iston hukumati iste’foga chiqarildi va narxlarni oshirish qarori bekor qilindi. Shunga qaramay, namoyishlar davom etdi.
Qozog‘iston hukumati yordam so‘rab KXShTga (Kollektiv xavfsizlik shartnomasi tashkiloti; uning tarkibiga Qozog‘istondan tashqari Rossiya, Belarus, Armaniston, Qirg‘iziston va Tojikiston ham kiradi) murojaat qildi. KXShT tinchlikparvar kuchlari Qozog‘istonga jo‘natildi.
Izoh (0)