Қозоғистонда норозилик намойишлари фонида мактаб ва университетлар учун қишки таътил узайтирилди

Қозоғистонда мактаб таътиллари 17 январга қадар узайтирилди, коллеж ва университет талабалари эса 24 январгача дам олади. Бу ҳақда 24kz давлат телеканали эфирида таълим вазирининг биринчи ўринбосари Шолпан Каринова маълум қилди, деб ёзмоқда «Интерфакс».

Вазир ўринбосарининг қўшимча қилишича, аксарият болалар боғчалари мамлакатдаги фавқулодда ҳолат ва комендантлик соатига қарамай, одатдагидек ишлашда давом этмоқда.

«Қишки таътилда мактаб ўқитувчилари ҳудуддаги шароитга қараб масофавий ёки анъанавий шаклда ишлайди. Болалар боғчалари ҳам муайян ҳудуддаги шароитга қарайди. Шу билан бирга, ҳозирда боғчаларнинг аксарияти болаларни қабул қилмоқда. Коллеж ва университет талабалари учун таътил академик календарга мувофиқ 24 январда тугайди», — дея хабар берган Қозоғистоннинг Tengrinews нашри.

«Фавқулодда ҳолат эълон қилиниши муносабати билан хорижий фуқароларнинг Қозоғистон ҳудудига кириши вақтинча тўхтатилди. Ушбу қоида, жумладан, пиёда, ҳаво ва бошқа ҳар қандай транспорт воситаларида келувчиларга тааллуқли», — дея қайд этган дипломатик вакил.

Шу билан бирга, Қозоғистон Ташқи ишлар вазирлиги расмий вакили Айбек Смадяров «Спутник Қазахистан» мухбирига хорижликларнинг мамлакатга кириши тўхтатилгани ҳақидаги маълумот «ҳақиқатга тўғри келмаслигини» айтган. У бошқа изоҳ бермаган.

Қозоғистонда 2 январдан бери давом этаётган оммавий норозилик намойишлари фонида бутун мамлакат бўйлаб фавқулодда ҳолат эълон қилинган, мамлакатда 23:00 дан 07:00 гача комендантлик соати амал қилади. Бундан ташқари, оммавий йиғилишлар тақиқланган.

Қозоғистондаги вазият суюлтирилган газ нархининг икки баравар ошишига қарши митинглар бошланганидан сўнг кескинлашди. Чиқишлар иқтисодий ва сиёсий талаблар билан бутун мамлакат бўйлаб оммавий норозилик намойишларига айланиб кетди. 4 ва 5 январь кунлари Олмаотада намойишчиларнинг хавфсизлик ходимлари билан тўқнашуви кузатилди.

5 январь куни Қозоғистон ҳукумати истеъфога чиқарилди ва нархларни ошириш қарори бекор қилинди. Шунга қарамай, намойишлар давом этди.

Қозоғистон ҳукумати ёрдам сўраб КХШТга (Коллектив хавфсизлик шартномаси ташкилоти; унинг таркибига Қозоғистондан ташқари Россия, Беларусь, Арманистон, Қирғизистон ва Тожикистон ҳам киради) мурожаат қилди. КХШТ тинчликпарвар кучлари Қозоғистонга жўнатилди.