Qozog‘iston hukumati mamlakatda yoqilg‘i narxlarini yarim yilga pasaytirdi

Qozog‘istonda benzin, dizel yoqilg‘isi va avtomobil gazi narxlarini 180 kunga davlat tomonidan tartibga solish belgilandi. Bu haqda hukumat xabariga tayanib, Tengrinews xabar berdi.

Avtomobil gazining maksimal narxlari quyidagicha belgilab qo‘yilgan:

• Akto‘be, Atirau va Mang‘istov viloyatlarida — bir litri uchun 50-55 tenge (1240-1360 so‘m);
• Chimkent, Sharqiy Qozog‘iston, Jambil, G‘arbiy Qozog‘iston, Qizilo‘rda va Turkiston viloyatlarida — bir litri uchun 60-65 tenge (1490-1610 so‘m);
• Olmaotada — bir litri uchun 65 tenge (1610 so‘m);
• Nursultonda — bir litri uchun 70 tenge (1740 so‘m).

Shuningdek, benzin narxlari vaqtincha cheklangan:

• Ai-80 — bir litri uchun 89 tenge (2200 so‘m);
• Ai-92 va Ai-93 — bir litri uchun 182 tenge (4500 so‘m);
• Ai-95 — bir litri uchun 215 tenge (5300 so‘m).

Aqmo‘la, Akto‘be, Sharqiy Qozog‘iston, G‘arbiy Qozog‘iston, Kostanay va Shimoliy Qozog‘iston viloyatlarida dizel uchun belgilangan maksimal narx — 260 tenge (6460 so‘m), Qozog‘istonning qolgan viloyatlarida esa bir litri uchun 240 tenge (5960 so‘m) etib belgilandi.Qozog‘istondagi vaziyat 2-yanvar kuni Janao‘zen shahrida (Mang‘istov viloyatidagi shahar) suyultirilgan gaz narxining ikki baravar oshishiga qarshi mitinglar boshlanganidan so‘ng keskinlashdi. Chiqishlar iqtisodiy va siyosiy talablar bilan butun mamlakat bo‘ylab ommaviy norozilik namoyishlariga aylanib ketdi. 4- va 5-yanvar kunlari Olmaotada namoyishchilarning xavfsizlik xodimlari bilan to‘qnashuvi kuzatildi.

Qozog‘iston prezidenti Qosim-Jo‘mart To‘qayev mamlakatdagi ommaviy tartibsizliklar paytida halok bo‘lganlar va jarohatlanganlar borligini aytdi.