Buxoroda o‘z onasini kaltaklagan 45 yoshli fuqaroga sud hukmi o‘qildi. Bu haqda “Daryo”ga Jinoyat ishlari bo‘yicha G‘ijduvon tumani sudi sudyasi Boborahim Ochilov ma’lum qildi.
Sud hujjatlariga ko‘ra, G‘ijduvon tumanidagi “Xalqobod” mahalla fuqarolar yig‘ini, Boylar qishlog‘ida tug‘ilgan erkak N.N. bir necha yildan buyon Navoiy viloyati, Konimex tumanida joylashgan uyda yashab kelgan.
2021-yil 15-iyulida o‘zi tug‘ilib o‘sgan va bugungi kunda akasiga rasman tegishli bo‘lgan eski uyga kelgan. Hovlida hech kim yo‘qligidan foydalanib, eski uyning pol, eshik va derazalarini o‘zboshimchalik bilan so‘roqsiz ravishda buzib, qo‘porib tashlay boshlagan. Oradan ancha vaqt o‘tgach, eski hovliga uning 72 yoshli otasi N.N. kelib, uning hatti-harakatidan hayratda qolgan va o‘g‘liga tanbeh berib, ogohlantirgan.
Otaning ogohlantiruvini inobatga olmagan o‘g‘il eshik-derazalarni jahl ustida qo‘porib tashlashda davom etavergan. Shundan so‘ng ota-o‘g‘il o‘rtasida janjal boshlangan. Otasi jahl ustida qo‘lidagi belkurakni unga qarab irg‘itgan va belkurak o‘g‘lining o‘ng oyog‘i tizza qismiga zarb bilan tegib ketgan. Janjal ustiga 69 yoshli onasi R.N. ham kelib qolgan. Ona o‘g‘lini otasi bilan tortishmaslikka, es-hushini yig‘ib olishga chaqirgan. Biroq onasining ham otasining yonini olayotganidan jahli chiqqan 45 yoshli o‘g‘il qo‘lidagi taxta bo‘lagi bilan onasini bir necha marotaba urgan va kaltaklagan. Qattiq zarbalardan yerga yiqilib, hushini yo‘qotgan onani chuqur yerga itarib yuborib, voqea joyidan qochib ketgan.
Ko‘maksiz va najotsiz qolgan keksa ota amallab qo‘ni-qo‘shnilarni yordamga chaqirgan. Qo‘shnilar zudlik bilan onani tuman markaziy shifoxonasiga keltirgan va unga tezkor tibbiy muolajalar ko‘rsatilgan. SSV sud tibbiy ekspertiza ilmiy amaliy markazi Buxoro filiali G‘ijduvon tuman bo‘linmasining xulosasiga ko‘ra, onaxonga chap chanoq qov va o‘tirg‘ich suyagi yopiq sinishi, chap tomon iyak, bo‘yin, o‘ng yelka, chap tirsak, o‘ng bilak, o‘ng kurak, bel, dumg‘aza, dumba sohalaridagi yaralar, shilinmalar va qontalashlar kabi sud tibbiy ekspertiza xulosasi yozilgan.
Oradan bir necha kun o‘tgach, o‘z onasiga nisbatan qasddan o‘rtacha og‘ir shikast yetkazgan o‘g‘il onasini ko‘rish uchun tuman markaziy kasalxonasiga borgan va kechirim so‘ragan. Sudda ham o‘z aybiga to‘liq iqrorligini, qilmishidan chin ko‘ngildan pushaymon ekanini, jahl ustida aqli qochganini bildirib, ko‘rsatuv bergan. Ona ham o‘g‘liga nisbatan da’vosi yo‘qligini aytib, unga qonuniy yengillik berib, ozodlikdan mahrum qilish bilan bog‘liq bo‘lmagan jazo tayinlashni so‘ragan.
2021-yilning 27-dekabrida jinoyat ishlari bo‘yicha G‘ijduvon tuman sudi hukmiga ko‘ra, ayblanuvchi N.N.ga nisbatan Jinoyat kodeksining 105-moddasi (qasddan badanga o‘rtacha og‘ir shikast yetkazish), 2-qismining “g, m” bandlari qo‘llanib, unga nisbatan 4 yilga ozodlikni cheklash jazosi tayinlangan.
Izoh (0)