Бухорода ўз онасини калтаклаган 45 ёшли фуқарога суд ҳукми ўқилди. Бу ҳақда «Дарё»га Жиноят ишлари бўйича Ғиждувон тумани суди судьяси Бобораҳим Очилов маълум қилди.
Суд ҳужжатларига кўра, Ғиждувон туманидаги «Халқобод» маҳалла фуқаролар йиғини, Бойлар қишлоғида туғилган эркак Н.Н. бир неча йилдан буён Навоий вилояти, Конимех туманида жойлашган уйда яшаб келган.
2021 йил 15 июлида ўзи туғилиб ўсган ва бугунги кунда акасига расман тегишли бўлган эски уйга келган. Ҳовлида ҳеч ким йўқлигидан фойдаланиб, эски уйнинг пол, эшик ва деразаларини ўзбошимчалик билан сўроқсиз равишда бузиб, қўпориб ташлай бошлаган. Орадан анча вақт ўтгач, эски ҳовлига унинг 72 ёшли отаси Н.Н. келиб, унинг ҳатти-ҳаракатидан ҳайратда қолган ва ўғлига танбеҳ бериб, огоҳлантирган.
Отанинг огоҳлантирувини инобатга олмаган ўғил эшик-деразаларни жаҳл устида қўпориб ташлашда давом этаверган. Шундан сўнг ота-ўғил ўртасида жанжал бошланган. Отаси жаҳл устида қўлидаги белкуракни унга қараб ирғитган ва белкурак ўғлининг ўнг оёғи тизза қисмига зарб билан тегиб кетган. Жанжал устига 69 ёшли онаси Р.Н. ҳам келиб қолган. Она ўғлини отаси билан тортишмасликка, эс-ҳушини йиғиб олишга чақирган. Бироқ онасининг ҳам отасининг ёнини олаётганидан жаҳли чиққан 45 ёшли ўғил қўлидаги тахта бўлаги билан онасини бир неча маротаба урган ва калтаклаган. Қаттиқ зарбалардан ерга йиқилиб, ҳушини йўқотган онани чуқур ерга итариб юбориб, воқеа жойидан қочиб кетган.
Кўмакциз ва нажотсиз қолган кекса ота амаллаб қўни-қўшниларни ёрдамга чақирган. Қўшнилар зудлик билан онани туман марказий шифохонасига келтирган ва унга тезкор тиббий муолажалар кўрсатилган. ССВ суд тиббий экспертиза илмий амалий маркази Бухоро филиали Ғиждувон туман бўлинмасининг хулосасига кўра, онахонга чап чаноқ қов ва ўтирғич суяги ёпиқ синиши, чап томон ияк, бўйин, ўнг елка, чап тирсак, ўнг билак, ўнг курак, бел, думғаза, думба соҳаларидаги яралар, шилинмалар ва қонталашлар каби суд тиббий экспертиза хулосаси ёзилган.
Орадан бир неча кун ўтгач, ўз онасига нисбатан қасддан ўртача оғир шикаст етказган ўғил онасини кўриш учун туман марказий касалхонасига борган ва кечирим сўраган. Судда ҳам ўз айбига тўлиқ иқрорлигини, қилмишидан чин кўнгилдан пушаймон эканини, жаҳл устида ақли қочганини билдириб, кўрсатув берган. Она ҳам ўғлига нисбатан даъвоси йўқлигини айтиб, унга қонуний енгиллик бериб, озодликдан маҳрум қилиш билан боғлиқ бўлмаган жазо тайинлашни сўраган.
2021 йилнинг 27 декабрида жиноят ишлари бўйича Ғиждувон туман суди ҳукмига кўра, айбланувчи Н.Н.га нисбатан Жиноят кодексининг 105-моддаси (қасддан баданга ўртача оғир шикаст етказиш), 2-қисмининг «г, м» бандлари қўлланиб, унга нисбатан 4 йилга озодликни чеклаш жазоси тайинланган.
Изоҳ (0)