Dunyo va o‘zbek sportiga oid 6-yanvarning eng muhim xabarlari dayjesti bilan tanishing.
O‘zbekiston
Futzal bo‘yicha Osiyo Kubogi—2022 saralash bosqichiga qur’a tashlandi
OFK qarorgohida 6-yanvar kuni futzal bo‘yicha 2022-yilgi Osiyo Kubogi musobaqasining saralash bahslariga qur’a tashlandi. O‘zbekiston futzal terma jamoasi Markaziy va Janubiy Osiyo mintaqasi saralashida Eron bilan birgalikda birinchi savatchadan joy oldi.
Qur’a natijalari bilan tanishing:
A guruhi
- Eron
- Qirg‘iziston
- Turkmaniston
- Maldiv
- O‘zbekiston
- Tojikiston
- Afg‘oniston
- Nepal
Sadriddin Abdullayev futbolchilik faoliyatini yakunladi
O‘zbekistonlik futbolchi Sadriddin Abdullayev butsilarini mixga ilishini ma’lum qildi. Bu haqda “Lokomotiv” matbuot xizmati ma’lum qildi.
Abdullayev endilikda “Lokomotiv” U-18 jamoasida bosh murabbiy bo‘lib ishlaydi.
35 yoshli Abdullayev “Lokomotiv”dan tashqari “Paxtakor”, “Dinamo”, “Sho‘rtan”, “Chanchun Yatay” (Xitoy) va “T-Tim” (Malayziya) kabi klublarda faoliyat yuritgan. Shuningdek, O‘zbekiston milliy terma jamoasida ham bir qator o‘yin o‘tkazgan.
Jahon
APLda dekabr oyining eng yaxshilari aniqlanmoqda
Angliya Premer Ligasining rasmiy sayti dekabr oyining eng yaxshi futbolchisi bo‘lish uchun nomzodlar ro‘yxatini taqdim etdi.
Ro‘yxatga yetti nafar futbolchi kiritilgan. Bular: Joau Kanselu (“Manchester Siti”), Jeyms Meddison (“Lester”), Gabriel Martinelli (“Arsenal”), Meyson Maunt (“Chelsi”), Martin Edegor (“Arsenal”), Son Hyon Min (“Tottenhem”) va Rahim Sterling (“Manchester Siti”.)
Liga, shuningdek, o‘tgan oyning eng yaxshi murabbiyi nomiga ham da’vorgarlarni e’lon qildi. Mazkur sovrin uchun Mikel Arteta (“Arsenal”), Antonio Konte (“Tottenhem”), Xosep Gvardiola (“Manchester Siti”) va Yurgen Klopp (“Liverpul”) kurash olib boradi.
G‘oliblar kelasi hafta e’lon qilinadi.
“Barselona”ning ikki futbolchisi jarohat oldi
“Barselona”ning ikki futbolchisi Ispaniya Kubogi doirasidagi “Linares”ga qarshi o‘yinda (2:1) jarohat oldi. Bu haqda klub matbuot xizmati ma’lum qildi.
Yarim himoyachi Frenki de Yongning chap oyoq boldir suyagi shikastlanishi tashxisi qo‘yilgan. Himoyachi Ronald Arauxoning o‘ng qo‘li suyaklari singan. Futbolchi 7-yanvar kuni operatsiya qilinadi.
Klub hozircha futbolchilarning tiklanish vaqtini ma’lum qilgani yo‘q.
Xosep Gvardiola koronavirusga chalindi
“Manchester Siti” bosh murabbiyi Xosep Gvardiolada koronavirus aniqlandi.
Shu tariqa 50 yoshli mutaxassis 7-yanvar kuni bo‘lib o‘tadigan Angliya Kubogi doirasidagi “Suindon”ga qarshi o‘yinni o‘tkazib yuboradi. Shuningdek, Gvardiolaning yordamchisi Xuanma Lilyo ham virus yuqtirib olgan. Ikkala mutaxassis ham izolyatsiyaga olingan.
Qayd etilishicha, hozirda “Manchester Siti”ning 21 a’zosi koronavirus tufayli izolyatsiyaga olingan — 14 xodim va 7 nafar futbolchi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)