Nomdor futbolchilarni yig‘ayotgan “Navbahor”, COVID sabab tang ahvolga tushgan “Liverpul” va eng qimmat futbolchilar reytingida 48-o‘rinda turgan Mbappe. Eng so‘nggi sport yangiliklari

Dunyo va o‘zbek sportiga oid 5-yanvarning eng muhim xabarlari dayjesti bilan tanishing.

O‘zbekiston

“Paxtakor” himoyachisi Anzur Ismoilov erkin agent maqomida “OKMK” safiga borib qo‘shildi. Shuningdek, “konchilar” himoyachi Sardor Rahmonov bilan amaldagi shartnomani 2023-yilning yoziga qadar uzaytirdi.

“Navbahor” “Paxtakor” himoyachisi Yegor Krimets va “Sonnam” yarim himoyachisi Jamshid Iskandarovni o‘z safiga qo‘shib oldi. Shuningdek, Xurshid Muxtorov namanganliklar safiga qaytgan bo‘lsa, hujumchi Andrey Sidorov ham faoliyatini “lochinlar” safida davom ettiradi.

“Paxtakor” o‘tgan mavsum “Bunyodkor”da harakat qilgan Mirjahon Mirahmadov transferini e’lon qildi.

“Dinamo” Jasur Hasanov, Obid Jo‘raboyev, Sardor Eminov, Ro‘zimboy Ahmedov, Islom Sharipov, G‘olib Sariboyev, Oleg Marchuk, Dmitro Sidorenko, Siroj Meliyev, Temur Hakimov va Temur Usmonov kabi futbolchilari bilan xayrlashdi.

Jahon

FIFA tomonida yilning eng yaxshi darvozaboniga beriladigan sovrin uchun Janluiji Donnarumma (“PSJ” / “Yuventus”, Italiya), Eduar Mendi (“Chelsi”, Senegal) va Manuel Noyer (“Bavariya”, Germaniya) da’vogarlik qilmoqda.

The Best sovrinlarini topshirish marosimi 17-yanvar kuni bo‘lib o‘tadi. Avvalroq yilning eng chiroyli goli uchun taqdim etiladigan Pushkash sovriniga da’vogarlar ro‘yxati e’lon qilingandi.

Messi koronavirusdan tuzaldi

“PSJ” hujumchisi Lionel Messi koronavirusdan forig‘ bo‘ldi. Argentinalik futbolchining seshanba kuni topshirgan test natijasi salbiy chiqqan.

Shundan so‘ng Messi oilasi bilan Argentinadan Fransiyaga uchib ketgan. 34 yoshli futbolchi tez orada mashg‘ulotlarni davom ettirishi kutilmoqda.

Eslatib o‘tamiz, “PSJ” 2-yanvar kuni Messining koronavirus bilan kasallanganini ma’lum qilgandi.

CIES ayni vaqtdagi eng qimmat futbolchilar ro‘yxatini e’lon qildi

Xalqaro sport tadqiqotlari markazi CIES Football Observatory Yevropa top-5 ligalarining eng qimmat futbolchilaridan iborat reytingni e’lon qildi.

CIES’ning maxsus algoritmi bo‘yicha hisoblab chiqilgan reytingda birinchi o‘rinni “Real” hujumchisi Vinisius Junior egallagan. Kusli uchlikdan Filip Foden (“Manchester Siti”) va Erling Holand (“Borussiya D”) joy olgan.

Qizig‘i, ko‘plab portallar talqini bo‘yicha dunyoning eng qimmat o‘yinchi sifatida e’tirof etilayotgan Kilian Mbappe ushbu ro‘yxatda 48-pog‘onani egallagan. Lionel Messi va Krishtianu Ronaldu esa top-100 likdan joy olmagan.

Reytingning top-10 ligi bilan tanishing:

1. Vinisius Junior – 166,4 mln yevro;
2. Filip Foden – 152,6;
3. Erling Holand – 142,5;
4. Meyson Grinvud – 133,9;
5. Florian Virts – 133;
6. Jud Bellinhem – 130,1;
7. Alfonso Devis – 122,3;
8. Ruben Diash – 120,5;
9. Pedri – 118;
10. Frenki de Yong – 115,2.

Angliya Liga Kubogi yarim finali doirasidagi “Arsenal” — “Liverpul” bahsi boshqa kunga qoldirildi. Bunga Mersisayd klubidagi koronavirus bilan bog‘liq tang vaziyat sabab bo‘ldi.

Uchrashuv 6-yanvardan 20-yanvarga ko‘chirildi.

“Liverpul”da koronavirus bilan bog‘liq vaziyat jiddiylashmoqda. Jamoa bosh murabbiyi Yurgen Klopp ketidan mutaxassisning asosiy yordamchisi Pep Leyndersda ham virus aniqlangan. Shuningdek, 5-yanvar kuni asosiy jamoa ikki futbolchisining testi ijobiy xulosa bergan. “Liverpul” jamoa mashg‘ulot bazasini yopgan.

Shota Arveladze RPL klubida ish boshlashi mumkin

“Paxtakor” sobiq ustozi “Krasnodar”da Viktor Goncharenkoning o‘rnini egallashi mumkin, deya xabar qilmoqda “Sport-Ekspress”.

Gruziyalik mutaxassisning so‘nggi jamoasi “Paxtakor” bo‘lgandi. U “sherlar” bilan ikki marta O‘zbekiston chempionligi va mamlakat kubogini qo‘lga kiritgan.