Dunyo va o‘zbek sportiga oid 4-yanvarning eng muhim xabarlari dayjesti bilan tanishing.
O‘zbekiston
IFFHS talqiniga ko‘ra Osiyoning eng yaxshi yosh o‘yinchilaridan iborat 2021-yil ramziy terma jamoasi tuzildi. Undan 2 nafar o‘zbekistonlik futbolchi joy oldiXalqaro futbol tarixi statistikasi federatsiyasi (IFFHS) Osiyoning eng yaxshi yosh o‘yinchilaridan iborat 2021-yil ramziy terma jamoasini tuzdi. Undan ikki nafar o‘zbekistonlik futbolchi ham joy oldi. Bular: “Nasaf” darvozaboni Abduvohid Ne’matov va “Nijniy Novgorod” (Rossiya) himoyachisi Ibrohimxalil Yo‘ldoshev.
Superliga klublari 2022-yilgi mavsum uchun yangi futbolchilar bilan shartnoma imzolamoqda
“Lokomotiv Toshkent” o‘tgan mavsumni “Qo‘qon-1912”da o‘tkazgan Muhammadanas Hasanov bilan ikki yillik shartnoma imzoladi.
2021-yilda “Turon” sharafini himoya qilgan Sunnatulla Abdullajonov esa “Neftchi”ga o‘tdi.
“OKMK” Xurshid G‘iyosov bilan ikki yillik shartnoma imzoladi. Hujumchi 2021-yilgi mavsumni “Bunyodkor” safida o‘tkazgandi.
Oleg Zoteyev erkin agentga aylandi
Oleg Zoteyev Janubiy Koreyaning “Chonnam Dragons” klubini tark etdi. Bu haqda klub matbuot xizmati xabar berdi.
O‘zbekistonlik yarim himoyachi shartnomasi yakunlanganidan so‘ng klubni erkin agent maqomida tark etgan. U 2020-yilning iyun oyidan beri mazkur klubda to‘p tepib kelayotgandi.
Noyabr oyida “Chonnam Dragons” Janubiy Koreya FA Kubogi sohibiga aylangandi va OChL yo‘llanmasiga ega bo‘lgandi.
Jahon
Pushkash sovriniga nomzodlar e’lon qilindi
Yilning eng chiroyli goli — Pushkash sovriniga da’vogarlik qilayotgan uch nafar futbolchi nomi ma’lum bo‘ldi.
G‘oliblikka “Tottenhem” yarim himoyachisi Erik Lamelaning rabona uslubida “Arsenal”ga (1:2) darvozasiga urgan goli, Chexiya terma jamoasi hujumchisi Patrik Shikning Yevro—2020 da Shotlandiyaga (2:0) uzoq masofadan yo‘llagan zarbasi va “Portu” forvardi Mehdi Taremining Chempionlar Ligasi doirasida “Chelsi”ga (1:0) qarshi o‘yindagi goli da’vogarlik qilmoqda.
Eslatib o‘tamiz, taqdirlash marosimi 17-yanvar kuni Syurixda bo‘lib o‘tadi, o‘sha kuni The Best g‘oliblari e’lon qilinadi.
Allegri Moratani “Barselona”ga qo‘yib yubormoqchi emas
Hujumchi Alvaro Morataning “Yuventus”dan “Barselona”ga transferi amalga oshmasligi mumkin.
Turin klubi uni hozircha qo‘yib yuborish niyatida emas. Boisi jamoa bosh murabbiyi Massimiliano Allegri mavsumning ikkinchi yarmida ham Moratani rejalariga kiritmoqda. Bu haqda Allegri dushanba kuni bo‘lib o‘tgan yig‘ilishda futbolchiga ma’lum qilgan. Bunga, birinchidan, ispaniyalikning yaxshi o‘yin ko‘rsatayotgani sabab bo‘layotgan bo‘lsa, ikkinchidan, transfer bozorida unga munosib alternativa yo‘q.
Avvalroq Morataning “Barselona”ga o‘tishi deyarli hal bo‘lgani haqida xabar berilgandi.
Koutinyo qishda “Barselona”dan ketmoqchi
Yarim himoyachi Filippe Koutinyo qishki transfer oynasida “Barselona”ni tark etmoqchi.
Ta’kidlanishicha, braziliyalik futbolchi Qatarda bo‘lib o‘tadigan Jahon Chempionatini inobatga olgan holda ko‘proq o‘yin amaliyotiga ega bo‘lmoqchi.
Hozirda unga “Nyukasl” va “Arsenal”dan qiziqish borligi aytilmoqda. Uning o‘zi “to‘pchilar” variantiga qiziqyapti.
L’Equipe yil ramziy terma jamoasiga Ronaldu va Messini kiritmadi
Fransiyaning L’Equipe jurnali 2021-yil uchun ramziy jamoasini tuzdi.
E’tiborlisi, unga “Oltin to‘p” sohibi, hozirda “PSJ”da to‘p surayotgan Lionel Messi kiritilmagan. Shuningdek, “Manchester Yunayted” hujumchisi Krishtianu Ronaldu ham tarkibdan o‘rin olmagan.
L’Equipe talqiniga ko‘ra 2021-yilning ramziy terma jamoasi:
Darvozabon: Eduar Mendi (“Chelsi”).
Himoyachilar: Trent Aleksander-Arnold (“Liverpul”), Ruben Diash (“Manchester Siti”), Markinyos (“PSJ”), Teo Ernandes (“Milan”);
Tayanch yarim himoyachilari: Ngolo Kante, Jorjinyo (ikkisi ham “Chelsi”);
Vingerlar: Muhammad Saloh (“Liverpul”), Kevin de Bryuyne (“Manchester Siti”).
Hujumchilar: Robert Levandovski (“Bavariya”), Karim Benzema (“Real”).
“Borussiya D” hujumchisi Erling Holand kelajakda qaysi jamoaga o‘tishi borasida yanvar oyi oxirigacha bir qarorga keladi.
Marca nashrining yozishicha, 21 yoshli hujumchi hozirda unga qiziqayotgan klublar bilan norasmiy muzokaralar olib bormoqda. “Barselona” vakillari futbolchi bilan uchrashuv o‘tkazgan, shuningdek, “Real” ham kelishuvni amalga oshirish ustida ishlamoqda.
Garchi “Barselona”da moliyaviy imkoniyatlar maqtanadigan darajada bo‘lmasa ham klub prezidenti Xoan Laporta Holand transferi uchun hammaga narsaga tayyorligini ma’lum qilgan. Madridliklarda esa bu borada hammasi ko‘ngildagidek.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)