Дунё ва ўзбек спортига оид 6 январнинг энг муҳим хабарлари дайжести билан танишинг.
Ўзбекистон
Футзал бўйича Осиё Кубоги—2022 саралаш босқичига қуръа ташланди
ОФК қароргоҳида 6 январь куни футзал бўйича 2022 йилги Осиё Кубоги мусобақасининг саралаш баҳсларига қуръа ташланди. Ўзбекистон футзал терма жамоаси Марказий ва Жанубий Осиё минтақаси саралашида Эрон билан биргаликда биринчи саватчадан жой олди.
Қуръа натижалари билан танишинг:
А гуруҳи
- Эрон
- Қирғизистон
- Туркманистон
- Мальдив
- Ўзбекистон
- Тожикистон
- Афғонистон
- Непал
Садриддин Абдуллаев футболчилик фаолиятини якунлади
Ўзбекистонлик футболчи Садриддин Абдуллаев бутсиларини михга илишини маълум қилди. Бу ҳақда «Локомотив» матбуот хизмати маълум қилди.
Абдуллаев эндиликда «Локомотив» U-18 жамоасида бош мураббий бўлиб ишлайди.
35 ёшли Абдуллаев «Локомотив»дан ташқари «Пахтакор», «Динамо», «Шўртан», «Чанчун Ятай» (Хитой) ва «Т-Тим» (Малайзия) каби клубларда фаолият юритган. Шунингдек, Ўзбекистон миллий терма жамоасида ҳам бир қатор ўйин ўтказган.
Жаҳон
АПЛда декабрь ойининг энг яхшилари аниқланмоқда
Англия Премер Лигасининг расмий сайти декабрь ойининг энг яхши футболчиси бўлиш учун номзодлар рўйхатини тақдим этди.
Рўйхатга етти нафар футболчи киритилган. Булар: Жоау Канселу («Манчестер Сити»), Жеймс Мэддисон («Лестер»), Габриэль Мартинелли («Арсенал»), Мэйсон Маунт («Челси»), Мартин Эдегор («Арсенал»), Сон Ҳён Мин («Тоттенҳэм») ва Раҳим Стерлинг («Манчестер Сити».)
Лига, шунингдек, ўтган ойнинг энг яхши мураббийи номига ҳам даъворгарларни эълон қилди. Мазкур соврин учун Микель Артета («Арсенал»), Антонио Конте («Тоттенҳэм»), Хосеп Гвардиола («Манчестер Сити») ва Юрген Клопп («Ливерпуль») кураш олиб боради.
Ғолиблар келаси ҳафта эълон қилинади.
«Барселона»нинг икки футболчиси жароҳат олди
«Барселона»нинг икки футболчиси Испания Кубоги доирасидаги «Линарес»га қарши ўйинда (2:1) жароҳат олди. Бу ҳақда клуб матбуот хизмати маълум қилди.
Ярим ҳимоячи Френки де Йонгнинг чап оёқ болдир суяги шикастланиши ташхиси қўйилган. Ҳимоячи Роналд Араухонинг ўнг қўли суяклари синган. Футболчи 7 январь куни операция қилинади.
Клуб ҳозирча футболчиларнинг тикланиш вақтини маълум қилгани йўқ.
Хосеп Гвардиола коронавирусга чалинди
«Манчестер Сити» бош мураббийи Хосеп Гвардиолада коронавирус аниқланди.
Шу тариқа 50 ёшли мутахассис 7 январь куни бўлиб ўтадиган Англия Кубоги доирасидаги «Суиндон»га қарши ўйинни ўтказиб юборади. Шунингдек, Гвардиоланинг ёрдамчиси Хуанма Лилё ҳам вирус юқтириб олган. Иккала мутахассис ҳам изоляцияга олинган.
Қайд этилишича, ҳозирда «Манчестер Сити»нинг 21 аъзоси коронавирус туфайли изоляцияга олинган — 14 ходим ва 7 нафар футболчи.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)