Xitoyning Milliy kiberxavfsizlikni tartibga soluvchi Kibermakon ma’muriyati mobil dasturlar uchun qoidalar loyihasini e’lon qildi. Bu haqda “RBK” xabar berdi.
Yangi talablarga ko‘ra, jamoatchilik fikriga ta’sir etishi mumkin bo‘lgan va “jamiyatni harakatga keltirishda ishtirok eta oladigan” dasturlar xavfsizlik ekspertizasidan o‘tishi kerak, deyiladi xabarda.
Qoidalar loyihasida, shuningdek, dastur va platformalar egalari konstitutsiya va Xitoy qonunlariga rioya etishi, “to‘g‘ri siyosiy yo‘nalishga amal qilishi” va “asosiy sotsialistik qadriyatlarni targ‘ib qilishi” zarurligi qayd etilgan. Dasturlardan “milliy xavfsizlikka tahdid qilish, jamoat tartibini, boshqalarning qonuniy huquqlari yoki manfaatlarini buzish” uchun foydalanilmasligi kerak.
Regulyator dasturlarni, shu jumladan, “ma’lumotlar xavfsizligining yashirin xavfi”ni tekshiradi. Qoidalarni buzgan manbalar ogohlantiriladi yoki faoliyatidan to‘xtatiladi.
4-yanvar kuni Xitoy hukumati xorij bozorlarida IPO (Initial public offering — fond birjasida aksiyalarning birlamchi ommaviy joylashtirilishi) o‘tkazishni rejalashtirayotgan onlayn platformalarga qo‘yiladigan talablarni ham qayta ko‘rib chiqdi. Gap 1 milliondan ortiq foydalanuvchiga ega platformalar haqida bormoqda. Yangi qoidalar 15-fevraldan kuchga kiradi.
Bunday platformalar xavfsizlik tekshiruvlaridan o‘tishi kerak. Regulyatorlar ommaviy taklif har qanday ma’lumotlarning xorijiy hukumatlar nazorati ostiga tushishiga va ular tomonidan o‘z maqsadlari uchun ishlatilishiga olib kelishi mumkin yoki yo‘qligini baholaydi. IPO’ga agar u milliy xavfsizlikka ta’sir qilmasagina ruxsat beriladi.
Eslatib o‘tamiz, Xitoyning ByteDance kompaniyasiga tegishli TikTok qisqa videoroliklar sayti 2021-yilda Google’ni ortda qoldirib, eng ommabop platformaga aylangandi.
Mavzuga doir:
Izoh (0)