Хитойнинг Миллий киберхавфсизликни тартибга солувчи Кибермакон маъмурияти мобил дастурлар учун қоидалар лойиҳасини эълон қилди. Бу ҳақда «РБК» хабар берди.
Янги талабларга кўра, жамоатчилик фикрига таъсир этиши мумкин бўлган ва «жамиятни ҳаракатга келтиришда иштирок эта оладиган» дастурлар хавфсизлик экспертизасидан ўтиши керак, дейилади хабарда.
Қоидалар лойиҳасида, шунингдек, дастур ва платформалар эгалари конституция ва Хитой қонунларига риоя этиши, «тўғри сиёсий йўналишга амал қилиши» ва «асосий социалистик қадриятларни тарғиб қилиши» зарурлиги қайд этилган. Дастурлардан «миллий хавфсизликка таҳдид қилиш, жамоат тартибини, бошқаларнинг қонуний ҳуқуқлари ёки манфаатларини бузиш» учун фойдаланилмаслиги керак.
Регулятор дастурларни, шу жумладан, «маълумотлар хавфсизлигининг яширин хавфи»ни текширади. Қоидаларни бузган манбалар огоҳлантирилади ёки фаолиятидан тўхтатилади.
4 январь куни Хитой ҳукумати хориж бозорларида IPO (Initial public offering — фонд биржасида акцияларнинг бирламчи оммавий жойлаштирилиши) ўтказишни режалаштираётган онлайн платформаларга қўйиладиган талабларни ҳам қайта кўриб чиқди. Гап 1 миллиондан ортиқ фойдаланувчига эга платформалар ҳақида бормоқда. Янги қоидалар 15 февралдан кучга киради.
Бундай платформалар хавфсизлик текширувларидан ўтиши керак. Регуляторлар оммавий таклиф ҳар қандай маълумотларнинг хорижий ҳукуматлар назорати остига тушишига ва улар томонидан ўз мақсадлари учун ишлатилишига олиб келиши мумкин ёки йўқлигини баҳолайди. IPO’га агар у миллий хавфсизликка таъсир қилмасагина рухсат берилади.
Эслатиб ўтамиз, Хитойнинг ByteDance компаниясига тегишли TikTok қисқа видеороликлар сайти 2021 йилда Google’ни ортда қолдириб, энг оммабоп платформага айланганди.
Изоҳ (0)