1 январь куни кечаси номаълум шахс Жанубий Кореяни тарк этиб, КХДР чегарасини босиб ўтди, деб хабар беради Associated Press агентлиги.
Жанубий Корея Бирлашган штаб бошлиқлари қўмитаси ҳарбийларининг маълум қилишича, эркакни Корея яриморолини ажратиб турувчи демилитаризация зонасида пайқаб қолишган. Даставвал ҳарбийлар кимни пайқагани номаълум бўлган: жанубий кореялик қочоқми ёки қўшни мамлакат ҳудудига ўтиб, яна ортга қайтган Шимолий Корея фуқароси. Суэлдаги ҳарбий раҳбарият Шимолий Корея ҳукуматидан қочоқнинг хавфсизлигини таъминлашни сўраган. Бироқ ҳозирча ҳеч қандай жавоб келмаган.
Кейинроқ чегарани ноқонуний кесиб ўтган шахс КХДРдан келган қочоқ экани маълум бўлган. 3 январь куни Жанубий Кореянинг Yonhap агентлиги мамлакат Мудофаа вазирлигига таяниб, кузатув камералари ёрдамида қонунбузарнинг шахсини аниқлашга муваффақ бўлинганини ёзди. 2020 йилнинг ноябрида у Шимолий Кореядан қочиб ўтган. Мудофаа вазирлигининг таъкидлашича, эркакни жосус деб ҳисоблашга ҳеч қандай асос йўқ.
Шимолий Кореяда қочоқни коронавирусга қарши қаттиқ чоралар сабаб ўлим жазоси кутаётган бўлиши мумкин
Мамлакат пандемия бошида туристлар учун чегараларини ёпган. КХДРдаги расмий ОАВлар маълумотларига кўра, 2021 йилнинг декабрь ҳолати бўйича Шимолий Кореяда коронавирус билан касалланиш бўйича бирорта ҳам ҳолат қайд этилмаган. Ушбу маълумотлар экспертларда шубҳа уйғотмоқда, аммо уни тасдиқлаш ёки рад этишнинг имкони йўқ. 2020 йилнинг сентябрида КХДР чегарачилари икки мамлакатнинг денгиз чегарасида бўлган жанубий кореялик амалдорни отиб ташлаб, унинг жасадини ёқиб юборганди. Ким Чен Ин Сеулдан расман кечирим сўраган. Жанубий Корея ҳарбийларининг маълумотларига кўра, Пхеньян мамлакатга коронавирус кириб келмаслиги учун ўт очиш сиёсатини жорий этган.
Демилитаризация зонаси орқали Жанубий Кореядан Шимолийга ўтиш — камдан кам учрайдиган ҳолат
Мамлакат чегарасидаги зонанинг кенглиги — 4 километрни, узунлиги эса 248 километрни ташкил этади. Ушбу ҳудудга 2 миллионга яқин мина ўрнатилган, атрофи тиканли панжаралар билан ўралган ва икки мамлакатнинг қуролланган қўшинлари қўриқлайди. 1953 йилда якунланган Корея урушидан буён КХДРни 34 мингдан ортиқ одам тарк этган, аммо уларнинг аксарияти Жанубий Кореяга Хитой ёки Жануби-Шарқий Осиёнинг бошқа мамлакатлари орқали келган.
Изоҳ (0)