Saakashvili agar xorijlik shifokorlar uning oldiga qo‘yilmasa, yana ochlik e’lon qilmoqchi

Gruziyaning sobiq prezidenti Mixail Saakashvili xorijlik shifokorlarning uni ko‘rikdan o‘tkazishiga ruxsat berilishini, shuningdek, advokatlar bilan ishonchli muloqot qilish huquqini talab qilmoqda. Aks holda, 6-yanvar kuni siyosatchi yana ochlik e’lon qiladi, dedi uning advokati Shota Tutberidze jurnalistlarga.

“Biz zudlik bilan Mixail Saakashvilini davolash jarayoni davom ettirilishini va uning oldiga AQSh, Ukraina va Niderlandiyadan kelgan shifokorlarning qo‘yilishini talab qilamiz. Bizda Mixail Saakashvili bilan konfidensial muloqot qilish imkoniyati yo‘q, bu esa advokat va mijozning asosiy huquqlarini buzishdir”, — dedi Tutberidze.

30-dekabrga o‘tar kechasi Saakashvili “kuch bilan” harbiy gospitaldan alohida mahbuslar uchun mo‘ljallangan Rustavi shahridagi maxsus hibsxonaga ko‘chirilgani xabar qilingandi. Qamoqxonaga qaytarilgandan so‘ng siyosatchi tarafdorlariga birinchi murojaatini yo‘lladi. Murojaatida Saakashvili hozir uning uchun “reabilitatsiya”dan keyin o‘zini tiklab, “hujum”ga tayyorgarlik ko‘rish muhim ekanini aytgan.

Shu bilan birga advokati Saakashvilining ahvoli og‘ir ekani, u o‘zi mustaqil ovqatlana olmayotganini ma’lum qilgan.

Sobiq prezident Gruziyaga 2021-yil oktabr oyi boshida mamlakatdagi munisipal saylovlarning birinchi bosqichidan sal oldin kelgan, shundan so‘ng u hibsga olingan. Qamoqxonada u o‘zini siyosiy mahbus deb hisoblagani uchun ochlik e’lon qilgan. Sog‘lig‘i yomonlashgani sababli siyosatchi avvaliga qamoqxona kasalxonasiga, keyin esa Gori shahridagi harbiy gospitalga yotqizilgan. 20-noyabr kuni u ochlikni to‘xtatganini e’lon qildi.

Saakashvili 2013-yilda Gruziyani tark etgan, shundan so‘ng mamlakatda unga qarshi to‘rtta jinoiy ish qo‘zg‘atilgan, shundan ikkitasida siyosatchi sirtdan uch va olti yillik qamoq jazosiga hukm qilingan. Saakashvili ustidan sud 2007-yil 7-noyabrdagi mitingni zo‘ravonlik bilan tarqatib yuborish va “Imedi” telekompaniyasi ofisini vayron qilish hamda qariyb 9 million lari (2,9 million dollardan ortiq) davlat mablag‘larini talon-taroj qilish ishi bo‘yicha olib borilmoqda. 2021-yilning 20-oktabrida Saakashvili chegarani noqonuniy kesib o‘tishda ayblangan, bu holatda u besh yilgacha qamoq jazosiga hukm qilinishi mumkin.