3-yanvar kuni amerikalik biznesmen Ilon Maskning boyligi qariyb 33 milliard dollarga oshdi va umumiy hisobda uning boyligi 304 milliard dollarga yetdi, deb xabar beradi Forbes.
Bundan oldin tadbirkorning kapitali 2021-yilning noyabrida 300 milliard dollarlik marrani zabt etgandi. SpaceX va Tesla asoschisi dunyodagi eng badavlat inson hisoblanadi. Maskning kapitali dunyoning eng badavlat insonlari ro‘yxatida ikkinchi o‘rinda ketayotgan Louis Vuitton Moët Hennessy rahbari Bernar Arnonikidan 100 milliard dollarga ko‘p. Uchinchi o‘rinda Amazon asoschisi Jeff Bezos ketmoqda.
Maskning boyligining oshishi Tesla aksiyalarining narxi ko‘tarilayotgani bilan bog‘liq. Kompaniya avtomobillar bozoriga yetkazib berilgan mashinalarining yakuniy sonini (930 mingdan ortiq) e’lon qilgach, ko‘tarilgan. Bu tahlilchilarning prognozlaridan oshib ketgan, Tesla aksiyasi 3-noyabr kungi savdolar yopilganida 13 foizga qimmatlagan. Shu bilan birga, kompaniyaning bozor kapitalizatsiyasi 1 trillion dollardan oshib ketgan.
Eslatib o‘tamiz, 2021-yilning 1-noyabrida Ilon Mask boyligi 300 milliarddan oshgan tarixdagi birinchi insonga aylangandi. O‘shanda Tesla aksiyalari bir kun ichida 7,5 foizga qimmatlashgan, biznesmenning boyligi esa turli baholashlarga ko‘ra, 308-311 milliard dollarga yetgan. Dekabr oyida Time jurnali Maskni “Yil odami” deya e’lon qilgan.
Izoh (0)