“Tolibon”: Afg‘onistondan boshqa davlatlarga tahdid qilish maqsadida foydalanishga yo‘l qo‘yilmaydi

29—30-noyabr kunlari Qatarda Amerika delegatsiyasi bilan uchrashuv o‘tkazgan “Tolibon” vakillari Afg‘oniston hududi uchinchi davlatlarga hujum uyushtirish yoki xavf tug‘dirishda foydalanilmasligini tasdiqladi. Bu haqda AQSh Davlat departamentiga tayanib, “Interfaks” xabar berdi.

“Toliblar Afg‘oniston hududidan biror-bir davlatga xavf tug‘dirish uchun hech kimning foydalanishiga imkon bermasligi borasidagi va’dasini tasdiqladi”, — deyiladi xabarda.

Ta’kidlanishicha, AQSh delegatsiyasi “Tolibon” yetakchilarining ayollar va qizlar ta’limining barcha darajasidan foydalanishida qo‘llab-quvvatlanishi borasidagi bayonotini alohida qayd etgan va “ushbu majburiyatlarni bajarishiga qattiq chaqirgan”.

“Tolibon” ta’lim sohasida qo‘llab-quvvatlashni so‘ragan va ta’limdan to‘liq foydalanish imkoniyatini ta’minlash uchun xalqaro hamjamiyatlar bilan ishlashga tayyorligini ma’lum qilgan. Davlat departamenti ayollar va qizlarni barcha darajadagi maktablarga jalb etish borasidagi yutuqlarni tekshirish va monitoring qilish borasidagi sa’y-harakatlarni olqishlagan.

Shuningdek, ma’lum qilinishicha, AQSh Afg‘onistonda “Al-Qoida” va IShIDning mavjudligidan, inson huquqlarining buzilishi haqidagi da’volardan xavotirda ekanini bildigan. Ular toliblarni “barcha afg‘onlarning huquqlarini himoya qilish, umumiy amnistiya siyosatini qo‘llab-quvvatlash va amalga oshirish, inklyuziv va vakillik hukumatini shakllantirish uchun qo‘shimcha choralar ko‘rishga” chaqirgan.

Tomonlar, shuningdek, xalqaro hamjamiyatlarning Afg‘onistondagi gumanitar inqirozga munosabatini ham muhokama qilgan. AQSh delegatsiyasi BMT va gumanitar tashkilotlarning joriy qish mavsumida insonlar hayotini saqlab qolish borasida ularning ehtiyojlarini qondirish uchun ushbu tadbirlarni kengaytirish bo‘yicha sa’y-harakatlarini qo‘llab-quvvatlashni davom ettirishga va’da bergan.

Afg‘oniston bo‘yicha maxsus vakil Tomas Uest Twitter’dagi sahifasi orqali muzokaralar davomida Amerika tomoni toliblardan 2020-yilda qo‘lga olingan AQSh fuqarosi Mark Frerixsni ozod etishni va afg‘on hukumat kuchlarining sobiq harbiy xizmatchilarining o‘ldirilishida aybdorlarni javobgarlikka tortishni talab qilgan.

“Tolibon” TIV matbuot kotibi Abdulqahor Balxiyning ma’lum qilishicha, toliblar delegatsiyasi AQShni xavfsizni ta’minlashga ishontirgan va Afg‘onistonning muzlatilgan pullarini qaytarishni, “qora ro‘yxatlar” va sanksiyalarni bekor qilishni hamda gumanitar masalalarni siyosatdan ajratishni so‘ragan.

AQSh delegatsiyasiga Afg‘oniston bo‘yicha maxsus vakil Tomas Uest boshchilik qilgan bo‘lib, uning tarkibidan Davlat departamenti, Moliya vazirligi, AQShning xalqaro taraqqiyot va razvedka hamjamiyati agentligi vakillari kirgan.

Avvalroq “Tolibon” O‘zbekiston va Tojikiston ko‘magiga muhtoj bo‘lmaydigan Harbiy havo kuchlarini yaratish niyatida ekani, “Tolibon” yetakchisi xalqaro xayriya tashkilotlaridan yordam so‘ragani to‘g‘risida xabar berilgandi.