3-yanvar kuni O‘zbekiston Milliy olimpiya qo‘mitasida shaxmatning rapid yo‘nalishi bo‘yicha jahon chempionligini qo‘lga kiritgan Nodirbek Abdusattorovni taqdirlash marosimi bo‘lib o‘tdi.
Tadbirda Abdusattorov “Mard o‘g‘lon” davlat mukofoti bilan taqdirlandi. Mukofotni Prezidentning yoshlar, fan, ta’lim, sog‘liqni saqlash va sport masalalari bo‘yicha maslahatchisi Abdujabbor Abduvohidov topshirdi.
Prezident matbuot kotibi Sherzod Asadov esa 17 yoshli shaxmatchiga Toshkent shahridan 2 xonali uy kalitini taqdim etdi.
Turizm va sport vaziri, bosh vazir o‘rinbosari, shaxmat federatsiyasi raisi Aziz Abduhakimov Nodirbek Abdusattorovni 250 million so‘m bilan mukofotladi.
Shuningdek, Abdusattorovning ustozlariga 100 million so‘mdan, blits yo‘nalishida muvaffaqiyatli ishtirok etgan Javohir Sindorovga 50 million so‘m pul mukofotlari berildi. Bundan tashqari, JCh qatnashchilari Jahongir Vohidov va Shamsiddin Vohidov ham taqdirlandi.
Nodirbek Abdusattorov 2017-yilda, 13 yoshida grossmeysterlik unvonini olgan. 2021-yil yanvar holatiga ko‘ra, Abdusattorov shaxmat tarixidagi eng yosh beshinchi grossmeyster bo‘lib turibdi. U 2018-yilda O‘zbekiston terma jamoasi safida Butunjahon shaxmat Olimpiadasida birinchi o‘rinni qo‘lga kiritgandi va Prezident sovg‘asi — Spark avtomobilini qabul qilib olgandi.
Qayd etish kerak, Abdusattorov Magnus Karlsenni mag‘lub etgan o‘zbekistonlik ikkinchi shaxmatchiga aylandi. 2018-yilda 16 yoshli Shamsiddin Vohidov Sankt-Peterburgda norvegiyalik shaxmatchidan ustun kelgandi.
Mavzuga doir:
Izoh (0)