“Barselona”ga yo‘l olishga yaqin turgan Morata, YTHga uchragan Abraham va tarkibini kuchaytirayotgan “Neftchi”. Eng so‘nggi sport yangiliklari

Dunyo va o‘zbek sportiga oid 3-yanvarning eng muhim xabarlari dayjesti bilan tanishing.

O‘zbekiston

Shaxmatning rapid yo‘nalishi bo‘yicha jahon chempionligini qo‘lga kiritgan Nodirbek Abdusattorovni taqdirlash marosimi bo‘lib o‘tdi

Polsha poytaxti Varshavada shaxmatning rapid yo‘nalishi bo‘yicha Jahon chempionligini qo‘lga kiritgan Nodirbek Abdusattorovni taqdirlash marosimi o‘tkazildi.

Tadbir avvalida Abdujabbor Abduvohidov Nodirbek Abdusattorovga Shavkat Mirziyoyevning tabrigini o‘qib eshittirdi va unga “Mard o‘g‘lon” davlat mukofotini topshirdi. Shundan so‘ng Nodirbekka Toshkent shahridan ikki xonali uyning kaliti va 250 million so‘m taqdim etildi.

Shuningdek, Abdusattorovning ustozlariga 100 million so‘mdan, blits yo‘nalishida muvaffaqiyatli ishtirok etgan Javohir Sindorovga 50 million so‘m pul mukofoti berildi. Bundan tashqari, JCh qatnashchilari Jahongir Vohidov va Shamsiddin Vohidov ham taqdirlandi.

“Neftchi” o‘z tarkibini kuchaytirib oldi

Farg‘onaliklar transfer oynasida faollik ko‘rsatmoqda. Klub serbiyalik himoyachi Daniel Stoykovich bilan shartnoma imzoladi. “Surxon” himoyachisi Husniddin G‘ofurov Farg‘ona klubiga qaytgan bo‘lsa, o‘tgan mavsumni “Nasaf”da o‘tkazgan Doniyor Narzullayev ham faoliyatini “Neftchi”da davom ettiradi.

“Neftchi” 3-yanvar kuni yana ikkita transferni e’lon qildi. So‘nggi uch mobaynida “Qizilqum”da to‘p surgan Muhsin Ubaydullayev, oxirgi besh yilda “Navbahor” sharafini himoya qilgan Mirzohid G‘ofurov ham “Neftchi” safiga qo‘shildi.

Jahon

Hakim Ziyosh terma jamoa murabbiyi bilan nizoga borgani sababli Afrika Millatlar Kubogida ishtirok etmaydi

28 yoshli futbolchi Marokash terma jamoasining qaydnomasiga kiritilmadi. Bu haqida Marokash futbol federatsiyasi prezidenti Fauzi Lakja ma’lum qildi.

Ziyosh Marokashning so‘nggi 10 o‘yinini o‘tkazib yubordi. Futbolchi terma jamoa murabbiyi Vohid Halilhojich bilan kelishmay qolgan. Shu sababli iyun oyidan buyon terma jamoadan chaqiruv olmayapti.

“U mashg‘ulotlardan qochib ketdi, oxirgi ikki yig‘inda intizomga rioya qilmadi. U terma jamoasi Jahon Chempionati uchun kurashayotgan futbolchiga o‘xshamaydi. Terma jamoa uchun o‘ynashdan qochadigan, testlar o‘ynashi mumkinligini ko‘rsatsa ham jarohatim bor deb bahona qiladigan futbolchini faoliyatim davomida ilk bor ko‘rishim. Men bunga toqat qilolmayman”, — degan edi 68 yoshli mutaxassis.

Temmi Abraham YTHga uchradi

“Roma”ning 24 yoshli hujumchisi rimliklar mashg‘ulotiga ketayotgan vaqtda YTHga uchragan. Abraham o‘zning Porsche Cayenne’nida boshqa mashinaga urilgan.

Yuz bergan hodisada hech kim jabrlanmagan, haydovchilar o‘rtasida masala politsiya aralashuvisiz hal bo‘lgan va Abraham mashg‘ulotga ravona bo‘lgan.

Eslatib o‘tamiz, angliyalik futbolchi “Roma”da Eldor Shomurodovga raqobatchi hisoblanadi. A Seriya joriy mavsumidagi 18 o‘yinda uning hisobida 6 ta gol mavjud.

Tomas Tuxel Romelu Lukakuni “Chelsi”da qolishini ta’kidladi

“Chelsi” bosh murabbiyi Tomas Tuxel ziddiyatli vaziyat bo‘lishiga qaramasdan Lukaku jamoada qolishini aytib o‘tdi. Belgiyalik hujumchi mojarolarga sabab bo‘ladigan intervyu berib o‘tdi, unda London jamoasidagi holatidan noroziligi, “Inter”ga muhabbati borligi va “nerazzurilar” safiga qaytmoqchiligini bildirgan.

Bosh murabbiy hujumchini “Liverpul”ga qarshi o‘yinda (2:2) maydonga tushirmadi va o‘yindan so‘ng o‘z qarorini quyidagicha izohladi:

“U bizning futbolchi va shunday bo‘lib qoladi. Doim o‘z futbolchilarimizni himoya qilamiz. Biz bunday qaror qabul qilishimizga (qaydnomaga kiritmaslik) matbuotni eshitish emas, aslida vaziyat qandayligini bilishni xohlaganimiz sabab bo‘ladi. U “Tottenhem”ga qarshi o‘yinda maydonga tushar, balki. Lekin hozir sizga hech narsa deya olmayman, avval u bilan gaplashib, vaziyatni oydinlashtirib olish lozim”.

Alvaro Morata “Barselona”ga o‘tishg yaqin

“Yuventus” safida ijarada harakat qilayotgan Morata Kataloniya jamoasiga borib qo‘shilishi mumkin. AS nashrining yozishicha, muzokaralarning 95% qismi hal bo‘lgan va ba’zi mayda detallar qolgan. “Yuventus” hujumchini yilning oxiriga qadar ijaraga berishga rozi bo‘lgan. “Atletiko” bilan ham kelishuvga erishilgan (Morataning transfer huquqi madridliklarga tegishli). Katta ehtimol bilan “matraschilar” yozda Antuan Grizmann uchun to‘lashi kerak bo‘lgan 40 million yevrodan voz kechiladi.

29 yoshli futbolchining turmush o‘rtog‘i Aliche Kampello Venetsiyadagi do‘stiga Ispaniyaga ko‘chib o‘tayotgani haqida xabar bergan.

Hozirda Morata agenti Xuanma Lopesdan shartnoma imzolangani haqidagi xabarini kutib turibdi. Shundan so‘ng hujumchi Barselonaga yo‘l oladi va “ko‘k-anorranglilar” bilan 18 oylik shartnoma imzolaydi.

Kataloniyaliklar bosh murabbiyi Xavi hujumchi bilan muzokaralar tezroq yakunlanishini va uni 12-yanvar kuni bo‘lib o‘tadigan “Real”ga qarshi Ispaniya Superkubogi yarim finalida maydonga tushirishni istamoqda.

FIFA prezidenti Janni Infantino Yevropa chempionatini ham ikki yilda bir marta o‘tkazish mumkinligi haqida gapirdi

Janni Infantino Jahon Chempionati bilan birgalikda Yevropa chempionatini ham har ikki yilda o‘tkazish ehtimoli borligini inkor etmadi.

“Avvalo, Jahon Chempionatini har ikki yilda o‘tkazish mening taklifim emasligini ta’kidlamoqchiman. Bunday islohotni FIFA Kongressining 88% a’zosi, bir nechta Yevropa mamlakatlari qo‘llab-quvvatlagan.

Mundialni har ikki yilda o‘tkazish imkoniyatlarini tekshirish uchun jiddiy izlanishlar olib bordik. Bunday holatda terma jamoalarning o‘yini kamayishi mumkin, lekin biz juda ko‘p hissiyotlarga boy o‘yinlarni ko‘ramiz. Yevropa chempionatini ham har ikki yilda bir o‘tkazish mumkin.

Italiya mundiallarda juda ko‘p ishtirok etadi, sport nuqtayi-nazaridan olib qaraydigan bo‘lsak, ushbu musobaqa mamlakatga katta ta’sir ko‘rsatadi. Lekin boshqa mamlakatlarga bunday omad kulib boqmaydi, axir musobaqada atigi 32 ta jamoa ishtirok etadi.

100 yil avval Jahon Chempionatini har to‘rt yilda o‘tkazish bo‘yicha qaror qabul qilingan. O‘sha vaqtlarda dunyoning 40 mamlakati — Yevropa va Janubiy Amerika davlatlari futbol o‘ynardi, xolos. Hozir 200 dan ziyod terma jamoalar mavjud. Bu vaziyatni ham hisobga olish lozim. Iqtisodiy ta’sir ham hamma uchun ijobiy bo‘ladi”, — deydi Infantino.