“Bu endi boshlanishi, g‘alabalar bardavom bo‘ladi”. Nodirbek Abdusattorovni taqdirlash marosimidan reportaj (foto va video)

Polshaning Varshava shahrida 25—31-dekabr kunlari shaxmatning rapid va blits yo‘nalishlari bo‘yicha Jahon chempionati o‘tkazildi. Unda O‘zbekiston nomidan ishtirok etgan Nodirbek Abdusattorov rapid yo‘nalishida musobaqa g‘olibligini qo‘lga kiritdi. U bu yo‘lda Yan Nepomnyashiy, Magnus Karlsen kabi nomdor shaxmatchilarni mag‘lubiyatga uchratgani alohida ta’kidlashga loyiq.

3-yanvar, dushanba kuni Milliy olimpiya qo‘mitasida 17 yoshli shaxmatchini taqdirlash marosimi o‘tkazildi. Tadbirda prezident maslahatchisi Abdujabbor Abduvohidov, prezident matbuot kotibi Sherzod Asadov, bosh vazir o‘rinbosari, turizm va sport vaziri Aziz Abduhakimov, Yoshlar ishlari agentligi direktori Alisher Sa’dullayev ishtirok etdi.

Tadbir avvalida Abdujabbor Abduvohidov Nodirbek Abdusattorovga Shavkat Mirziyoyevning tabrigini o‘qib eshittirdi va unga “Mard o‘g‘lon” davlat mukofotini topshirdi.

Shundan so‘ng Nodirbekka Toshkent shahridan ikki xonali uyning kaliti va 250 million so‘m taqdim etildi.

Shuningdek, Abdusattorovning ustozlariga 100 million so‘mdan, blits yo‘nalishida muvaffaqiyatli ishtirok etgan Javohir Sindorovga 50 million so‘m pul mukofoti berildi. Bundan tashqari, JCh qatnashchilari Jahongir Vohidov va Shamsiddin Vohidov ham taqdirlandi.

MOQdagi tadbirdan so‘ng jahon chempionati ishtirokchilari va rasmiylar “Yangi O‘zbekiston” bog‘ida tashkil etilgan uchrashuvga yo‘l oldi. “Daryo” ushbu marosimlardan tayyorlangan suratlarni taqdim etadi.

“Prezidentimiz va hukumatimizning bunday e’tiboridan xursandman. Ishontirib aytamanki, bu endi boshlanishi, g‘alabalar bardavom bo‘ladi. Nasib qilsa, kelgusida klassik yo‘nalishda ham jahon tojini O‘zbekistonga olib kelamiz”, – deydi Nodirbek Abdusattorov.

MOQdagi tadbirdan keyin marosim ishtirokchilari “Yangi O‘zbekiston” bog‘iga yo‘l oldi.

Nodirbek Abdusattorov 2017-yilda, 13 yoshida grossmeysterlik unvonini olgan. 2021-yil yanvar holatiga ko‘ra, Abdusattorov shaxmat tarixidagi eng yosh beshinchi grossmeyster bo‘lib turibdi. U 2018-yilda O‘zbekiston terma jamoasi safida Butunjahon shaxmat Olimpiadasida birinchi o‘rinni qo‘lga kiritgandi va prezident sovg‘asi — Spark avtomobilini qabul qilib olgandi.

Qayd etish kerak, Abdusattorov Magnus Karlsenni mag‘lub etgan o‘zbekistonlik ikkinchi shaxmatchiga aylandi. 2018-yilda 16 yoshli Shamsiddin Vohidov Sankt-Peterburgda norvegiyalik shaxmatchidan ustun kelgandi.