Дунё ва ўзбек спортига оид 3 январнинг энг муҳим хабарлари дайжести билан танишинг.
Ўзбекистон
Шахматнинг рапид йўналиши бўйича жаҳон чемпионлигини қўлга киритган Нодирбек Абдусатторовни тақдирлаш маросими бўлиб ўтди
Польша пойтахти Варшавада шахматнинг рапид йўналиши бўйича Жаҳон чемпионлигини қўлга киритган Нодирбек Абдусатторовни тақдирлаш маросими ўтказилди.
Тадбир аввалида Абдужаббор Абдувоҳидов Нодирбек Абдусатторовга Шавкат Мирзиёевнинг табригини ўқиб эшиттирди ва унга «Мард ўғлон» давлат мукофотини топширди. Шундан сўнг Нодирбекка Тошкент шаҳридан икки хонали уйнинг калити ва 250 миллион сўм тақдим этилди.
Шунингдек, Абдусатторовнинг устозларига 100 миллион сўмдан, блиц йўналишида муваффақиятли иштирок этган Жавоҳир Синдоровга 50 миллион сўм пул мукофоти берилди. Бундан ташқари, ЖЧ қатнашчилари Жаҳонгир Воҳидов ва Шамсиддин Воҳидов ҳам тақдирланди.
Мавзуга доир: «Бу энди бошланиши, ғалабалар бардавом бўлади». Нодирбек Абдусатторовни тақдирлаш маросимидан репортаж (фото ва видео)
Фарғоналиклар трансфер ойнасида фаоллик кўрсатмоқда. Клуб сербиялик ҳимоячи Даниэль Стойкович билан шартнома имзолади. «Сурхон» ҳимоячиси Ҳусниддин Ғофуров Фарғона клубига қайтган бўлса, ўтган мавсумни «Насаф»да ўтказган Дониёр Нарзуллаев ҳам фаолиятини «Нефтчи»да давом эттиради.
«Нефтчи» 3 январь куни яна иккита трансферни эълон қилди. Сўнгги уч мобайнида «Қизилқум»да тўп сурган Муҳсин Убайдуллаев, охирги беш йилда «Навбаҳор» шарафини ҳимоя қилган Мирзоҳид Ғофуров ҳам «Нефтчи» сафига қўшилди.
Жаҳон
Ҳаким Зиёш терма жамоа мураббийи билан низога боргани сабабли Африка Миллатлар Кубогида иштирок этмайди
28 ёшли футболчи Марокаш терма жамоасининг қайдномасига киритилмади. Бу ҳақида Марокаш футбол федерацияси президенти Фаузи Лакжа маълум қилди.
Зиёш Марокашнинг сўнгги 10 ўйинини ўтказиб юборди. Футболчи терма жамоа мураббийи Воҳид Ҳалилҳожич билан келишмай қолган. Шу сабабли июнь ойидан буён терма жамоадан чақирув олмаяпти.
«У машғулотлардан қочиб кетди, охирги икки йиғинда интизомга риоя қилмади. У терма жамоаси Жаҳон Чемпионати учун курашаётган футболчига ўхшамайди. Терма жамоа учун ўйнашдан қочадиган, тестлар ўйнаши мумкинлигини кўрсаца ҳам жароҳатим бор деб баҳона қиладиган футболчини фаолиятим давомида илк бор кўришим. Мен бунга тоқат қилолмайман», — деган эди 68 ёшли мутахассис.
Тэмми Абраҳам ЙТҲга учради
«Рома»нинг 24 ёшли ҳужумчиси римликлар машғулотига кетаётган вақтда ЙТҲга учраган. Абраҳам ўзнинг Porsche Cayenne’нида бошқа машинага урилган.
Юз берган ҳодисада ҳеч ким жабрланмаган, ҳайдовчилар ўртасида масала полиция аралашувисиз ҳал бўлган ва Абраҳам машғулотга равона бўлган.
Эслатиб ўтамиз, англиялик футболчи «Рома»да Элдор Шомуродовга рақобатчи ҳисобланади. А Серия жорий мавсумидаги 18 ўйинда унинг ҳисобида 6 та гол мавжуд.Томас Тухель Ромелу Лукакуни «Челси»да қолишини таъкидлади
«Челси» бош мураббийи Томас Тухель зиддиятли вазият бўлишига қарамасдан Лукаку жамоада қолишини айтиб ўтди. Бельгиялик ҳужумчи можароларга сабаб бўладиган интервью бериб ўтди, унда Лондон жамоасидаги ҳолатидан норозилиги, «Интер»га муҳаббати борлиги ва «нераззурилар» сафига қайтмоқчилигини билдирган.
Бош мураббий ҳужумчини «Ливерпуль»га қарши ўйинда (2:2) майдонга туширмади ва ўйиндан сўнг ўз қарорини қуйидагича изоҳлади:
«У бизнинг футболчи ва шундай бўлиб қолади. Доим ўз футболчиларимизни ҳимоя қиламиз. Биз бундай қарор қабул қилишимизга (қайдномага киритмаслик) матбуотни эшитиш эмас, аслида вазият қандайлигини билишни хоҳлаганимиз сабаб бўлади. У «Тоттенҳэм»га қарши ўйинда майдонга тушар, балки. Лекин ҳозир сизга ҳеч нарса дея олмайман, аввал у билан гаплашиб, вазиятни ойдинлаштириб олиш лозим».Альваро Мората «Барселона»га ўтишг яқин
«Ювентус» сафида ижарада ҳаракат қилаётган Мората Каталония жамоасига бориб қўшилиши мумкин. АS нашрининг ёзишича, музокараларнинг 95% қисми ҳал бўлган ва баъзи майда деталлар қолган. «Ювентус» ҳужумчини йилнинг охирига қадар ижарага беришга рози бўлган. «Атлетико» билан ҳам келишувга эришилган (Моратанинг трансфер ҳуқуқи мадридликларга тегишли). Катта эҳтимол билан «матрасчилар» ёзда Антуан Гризманн учун тўлаши керак бўлган 40 миллион евродан воз кечилади.
29 ёшли футболчининг турмуш ўртоғи Аличе Кампелло Венециядаги дўстига Испанияга кўчиб ўтаётгани ҳақида хабар берган.
Ҳозирда Мората агенти Хуанма Лопесдан шартнома имзолангани ҳақидаги хабарини кутиб турибди. Шундан сўнг ҳужумчи Барселонага йўл олади ва «кўк-анорранглилар» билан 18 ойлик шартнома имзолайди.
Каталонияликлар бош мураббийи Хави ҳужумчи билан музокаралар тезроқ якунланишини ва уни 12 январь куни бўлиб ўтадиган «Реал»га қарши Испания Суперкубоги ярим финалида майдонга туширишни истамоқда.ФИФА президенти Жанни Инфантино Европа чемпионатини ҳам икки йилда бир марта ўтказиш мумкинлиги ҳақида гапирди
Жанни Инфантино Жаҳон Чемпионати билан биргаликда Европа чемпионатини ҳам ҳар икки йилда ўтказиш эҳтимоли борлигини инкор этмади.
«Аввало, Жаҳон Чемпионатини ҳар икки йилда ўтказиш менинг таклифим эмаслигини таъкидламоқчиман. Бундай ислоҳотни ФИФА Конгрессининг 88% аъзоси, бир нечта Европа мамлакатлари қўллаб-қувватлаган.
Мундиални ҳар икки йилда ўтказиш имкониятларини текшириш учун жиддий изланишлар олиб бордик. Бундай ҳолатда терма жамоаларнинг ўйини камайиши мумкин, лекин биз жуда кўп ҳиссиётларга бой ўйинларни кўрамиз. Европа чемпионатини ҳам ҳар икки йилда бир ўтказиш мумкин.
Италия мундиалларда жуда кўп иштирок этади, спорт нуқтайи-назаридан олиб қарайдиган бўлсак, ушбу мусобақа мамлакатга катта таъсир кўрсатади. Лекин бошқа мамлакатларга бундай омад кулиб боқмайди, ахир мусобақада атиги 32 та жамоа иштирок этади.
100 йил аввал Жаҳон Чемпионатини ҳар тўрт йилда ўтказиш бўйича қарор қабул қилинган. Ўша вақтларда дунёнинг 40 мамлакати — Европа ва Жанубий Америка давлатлари футбол ўйнарди, холос. Ҳозир 200 дан зиёд терма жамоалар мавжуд. Бу вазиятни ҳам ҳисобга олиш лозим. Иқтисодий таъсир ҳам ҳамма учун ижобий бўлади», — дейди Инфантино.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)