O‘zbekistonga ayrim davlatlardan keluvchilar 10 kunlik majburiy karantinga olinadi

O‘zbekistonda epidemiologik vaziyat barqarorligini saqlab qolish va mamlakat hududiga koronavirusning “omikron” shtammi kirib kelishiga yo‘l qo‘ymaslik maqsadida Respublika maxsus komissiyasi bir qator yangi tartib va cheklovlar belgiladi, deb xabar bermoqda Sog‘liqni saqlash vazirligi matbuot xizmati.

Unga ko‘ra, endilikda xorijiy davlatlardan O‘zbekistonga tashrif buyuruvchilar:

• mamlakatga tashrif buyurishidan kamida 72 soat oldin topshirilgan koronavirus infeksiyasiga PZR test natijasi bo‘yicha manfiy ko‘rsatkichga ega ma’lumotnomaga ega bo‘lishi lozim;
• koronavirus infeksiyasiga PZR test natijasi bo‘yicha manfiy ko‘rsatkichga ega ma’lumoti mavjud bo‘lmaganda, aeroport, temiryo‘l vokzallari va chegara o‘tkazish punktlarida tashkil etilgan koronavirus infeksiyasiga ekspress test topshirishlari shart.

Shuningdek, Avstraliya, Avstriya, Belgiya, Buyuk Britaniya, Germaniya, Daniya, Isroil, Italiya, Niderlandiya, Chexiya va Misr davlatlari hududidan O‘zbekistonga kirib keluvchi yo‘lovchilar yuqoridagi talablar bajarilgandan so‘ng mamlakat hududiga kirib kelgan kundan e’tiboran 10 kun davomida majburiy uy karantini yoki o‘z hisoblaridan mehmonxonaga karantinga joylashtiriladi.

Bundan avval Respublika maxsus komissiyasi qarori bilan O‘zbekiston epidemiologik vaziyat murakkab bo‘lgan bir qator davlatlar bilan xalqaro aviaqatnovlarni to‘xtatishi haqida xabar berilgan edi.