G‘arb OAVlari Kim Chen Inning 3 yillik suratlarini solishtirib, uning juda ozib ketganidan hayratga tushdi (foto)

G‘arb ommaviy axborot vositalari KXDR yetakchisi Kim Chen Inning yangi va eski suratlarini solishtirib, uning so‘nggi paytlarda qanchalik ozib ketganidan hayratga tushdi.

Britaniyaning Daily Mail gazetasi 28-dekabr kuni Shimoliy Koreya markaziy telegraf agentligi tomonidan e’lon qilingan Kim Chen Inning suratini o‘z veb-saytiga joylashtirdi. Surat KXDR rahbarining Koreya Mehnat partiyasi markaziy qo‘mitasi yig‘ilishidagi ishtirokidan olingan.

Shimoliy Koreya rahbari qanchalik vazn yo‘qotganini ko‘rsatish uchun gazeta uning 2019-yil yanvar va 2020-yil mart oylarida olingan suratlarini ham joylashtirgan.

“Bu suratlarda KXDR yetakchisi Kim Chen In sezilarli darajada to‘laroq ko‘rinadi”, — deydi Daily Mail o‘tgan yillardagi suratlarga ishora qilib.

Avvalroq KXDR OAVlari Kim Chen Inning vazn yo‘qotishini mamlakat farovonligi yo‘lidagi mashaqqatli mehnatlarining oqibati bilan izohlagandi. Janubiy Koreya OAVlari manbalarga tayanib, Shimoliy Koreya yetakchisi sog‘lig‘iga jiddiy e’tibor qaratib, atay vazn tashlagani haqida xabar berdi. Oktabr oyida Yonhap agentligi Janubiy Koreya razvedkasiga tayanib, Kim Chen In 20 kilogramm vazn yo‘qotgani, ammo sog‘lig‘ida hech qanday muammo yo‘qligini xabar qilgan.

Sentabr boshida Kim Chen Inning internetda chop etilgan foto va videotasvirlari keng muhokama qilingan. Kadrlar Kimning sog‘lig‘i haqida yangi mish-mishlarga sabab bo‘lgan. Avgust boshida Kim Chen Inning boshidagi dog‘lar uning sog‘lig‘i haqida yana bir munozaraga sabab bo‘lgandi.