Uzoq kutilgan transferni e’lon qilgan “Barselona”, maxsus sovrin bilan taqdirlangan Ronaldinyo va 40 yoshgacha futbol o‘ynashni rejalashtirayotgan Ronaldu. Eng so‘nggi sport yangiliklari

Dunyo va o‘zbek sportiga oid 28-dekabrning eng muhim xabarlari dayjesti bilan tanishing.

O‘zbekiston

O‘zbekistonlik sobiq futbolchi Nikolay Shirshov 47 yoshida vafot etdi. Sobiq futbolchining o‘limiga qon tomirlaridagi trombning bexosdan yorilib ketishi sabab bo‘lgan. Bu haqida uning hamkasbi “DonDay.ru” saytiga ma’lum qilgan.

Ma’lumot uchun, Shirshov Rostov viloyatining Novoshaxtinsk shahrida istiqomat qilgan va murabbiy sifatida faoliyat yuritgan. U futbolchilik faoliyati davomida O‘zbekiston terma jamoasi, “Traktor”, “Paxtakor” va “Rostov” safida to‘p surgan.

Jahon

“Barselona” Ferran Torres transferini e’lon qildi

Klub matbuot xizmati 21 yoshli ispaniyalik futbolchi bilan 2027-yilning 30-iyuniga qadar mo‘ljallangan shartnoma imzolanganini ma’lum qildi. Futbolchining tovon puli esa bir milliard yevro etib belgilangan.

Torresning taqdimoti 3-yanvar, dushanba kuni bo‘lib o‘tadi.

Avvalroq “Barselona” Torres uchun “Manchester Siti”ga 55 million yevro va 10 million yevro bonus berishi xabar berilgandi.

“Barselona”dagi koronavirusga chalingan futbolchilar soni 3 nafarga yetdi

“Barselona” himoyachisi Xordi Alba koronavirusga chalindi. Shu tariqa jamoada virusga chalingan futbolchilar soni 3 nafarga yetdi.

Avvalroq, Kleman Langle va Dani Alves ham koronavirusga ijobiy test topshirgandi.

“Barselona” navbatdagi o‘yinini 2-yanvar kuni “Malyorka”ga qarshi o‘tkazadi.

Ronaldinyo maxsus sovrin bilan taqdirlandi

“Barselona”, “Milan” va Braziliya terma jamoasi sobiq futbolchisi Ronaldinyo Globe Soccer Awards tomonidan ajoyib faoliyati uchun maxsus sovrin bilan taqdirlandi.

Ronaldinyo 2018-yilning yanvarida faoliyatini yakunlagan. Braziliyalik futbolchining so‘nggi klubi “Fluminense” bo‘lgandi.

Ronaldinyo Braziliya terma jamoasi bilan 2002-yilgi Jahon chempionatida g‘olib chiqqan, 2005-yilda esa “Oltin to‘p”ni qo‘lga kiritgan.

Globe Soccer Awards’ning boshqa nominatsiyalar bo‘yicha g‘oliblari bilan bu yerda tanishi mumkin.

Ronaldu 40 yoshgacha futbol o‘ynashni rejalashtirgan

“Manchester Yunayted” hujumchisi Krishtianu Ronalduning onasi Dolores Aveyru 36 yoshli o‘g‘lining qachongacha davom ettirishini ma’lum qildi.

Doloresning so‘zlariga ko‘ra, Ronaldu 40 yoshgacha futbol o‘ynashni rejalashtirgan.

Ma’lumot uchun, Ronaldu 2021/22-yilgi mavsumda Angliya Premyer Ligasida 14 o‘yinda maydonga tushib, 7 ta gol va 2 ta golli uzatmaga mualliflik qilgan.