Дунё ва ўзбек спортига оид 28 декабрнинг энг муҳим хабарлари дайжести билан танишинг.
Ўзбекистон
Николай Ширшов вафот этди
Ўзбекистонлик собиқ футболчи Николай Ширшов 47 ёшида вафот этди. Собиқ футболчининг ўлимига қон томирларидаги тромбнинг бехосдан ёрилиб кетиши сабаб бўлган. Бу ҳақида унинг ҳамкасби «DonDay.ru» сайтига маълум қилган.
Маълумот учун, Ширшов Ростов вилоятининг Новошахтинск шаҳрида истиқомат қилган ва мураббий сифатида фаолият юритган. У футболчилик фаолияти давомида Ўзбекистон терма жамоаси, «Трактор», «Пахтакор» ва «Ростов» сафида тўп сурган.
Жаҳон
«Барселона» Ферран Торрес трансферини эълон қилди
«Барселона» ярим ҳимоячи Ферран Торрес трансферини эълон қилди.
Клуб матбуот хизмати 21 ёшли испаниялик футболчи билан 2027 йилнинг 30 июнига қадар мўлжалланган шартнома имзоланганини маълум қилди. Футболчининг товон пули эса бир миллиард евро этиб белгиланган.
Торреснинг тақдимоти 3 январь, душанба куни бўлиб ўтади.
Аввалроқ «Барселона» Торрес учун «Манчестер Сити»га 55 миллион евро ва 10 миллион евро бонус бериши хабар берилганди.
«Барселона»даги коронавирусга чалинган футболчилар сони 3 нафарга етди
«Барселона» ҳимоячиси Хорди Альба коронавирусга чалинди. Шу тариқа жамоада вирусга чалинган футболчилар сони 3 нафарга етди.
Аввалроқ, Клеман Лангле ва Дани Алвес ҳам коронавирусга ижобий тест топширганди.
«Барселона» навбатдаги ўйинини 2 январь куни «Мальорка»га қарши ўтказади.
Роналдиньо махсус соврин билан тақдирланди
«Барселона», «Милан» ва Бразилия терма жамоаси собиқ футболчиси Роналдиньо Globe Soccer Awards томонидан ажойиб фаолияти учун махсус соврин билан тақдирланди.
Роналдиньо 2018 йилнинг январида фаолиятини якунлаган. Бразилиялик футболчининг сўнгги клуби «Флуминенсе» бўлганди.
Роналдиньо Бразилия терма жамоаси билан 2002 йилги Жаҳон чемпионатида ғолиб чиққан, 2005 йилда эса «Олтин тўп»ни қўлга киритган.
Globe Soccer Awards’нинг бошқа номинациялар бўйича ғолиблари билан бу ерда таниши мумкин.
Роналду 40 ёшгача футбол ўйнашни режалаштирган
«Манчестер Юнайтед» ҳужумчиси Криштиану Роналдунинг онаси Долорес Авейру 36 ёшли ўғлининг қачонгача давом эттиришини маълум қилди.
Долореснинг сўзларига кўра, Роналду 40 ёшгача футбол ўйнашни режалаштирган.
Маълумот учун, Роналду 2021/22 йилги мавсумда Англия Премьер Лигасида 14 ўйинда майдонга тушиб, 7 та гол ва 2 та голли узатмага муаллифлик қилган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)