Nikolay Shirshovning o‘limiga nima sabab bo‘lgani aytildi

O‘zbekistonlik sobiq futbolchi Nikolay Shirshov vafot etgani haqidagi xabarlar 28-dekabr kuni yangradi.

Sobiq futbolchining o‘limiga qon tomirlaridagi trombning bexosdan yorilib ketishi sabab bo‘lgan. Bu haqida uning hamkasbi “DonDay.ru” saytiga xabar qildi.

Ma’lum bo‘lishcha, Shirshov Rostov viloyatining Novoshaxtinsk shahrida istiqomat qilgan va murabbiy sifatida faoliyat yuritgan.

Nikolay Shirshov 1974-yilning 22-iyunida Toshkent shahrida tug‘ilgan. Faoliyatini Toshkent viloyatining “Sverlovets” (1991-yil) klubida boshlagan Shirshov keyinchalik “Traktor” va “Paxtakor” safida to‘p suradi. U “sherlar” tarkibida (1992—1999) 159 ta rasmiy o‘yinda maydonga tushib, 16 ta golga muallif qilgan. Keyinchalik futbolchi besh yil davomida (2000—2005) “Rostov” sharafini himoya qiladi.

Shuningdek, Shirshov Rossiyaning “SKA”, “Bataysk-2007”, “Taganrog”, “MITOS” va “TPF” klublarida ham o‘ynagan. Nikolay 2013-yilda futbolchilik faoliyatini yakunlagandi.

O‘zbekiston milliy terma jamoasi libosida (1996—2005) esa 64 ta o‘yinda qatnashib, 13 ta gol urgan.