Dunyo va o‘zbek sportiga oid 27-dekabrning eng muhim xabarlari dayjesti bilan tanishing.
O‘zbekiston
Srechko Katanes Yaponiyaga qarshi o‘yin uchun qaydnomani e’lon qildi
Yaponiyaning “Saitama” stadionida 21-yanvar kuniga belgilangan o‘yinga 23 nafar futbolchi jalb etilgan. E’tiborlisi, qaydnomada birorta ham legioner futbolchi yo‘q.
Tarkibga “Paxtakor” va “Nasaf”dan 8 nafar, “Lokomotiv”dan 4 nafar futbolchi jalb etilgan bo‘lsa. Qolgan uch futbolchi “OKMK”, “Navbahor” va “Bunyodkor” klublaridan olingan.
Qayd etish kerak, Yaponiyada ayni vaqtda chet eldan tashrif buyuruvchilar uchun qat’iy karantin cheklovlari mavjud.
“Qizilqum” bosh murabbiyi deputatga aylandi
Hamidjon Aktamov Navoiy viloyati Karmana tumani kengashiga deputat etib saylandi. Liberal demokratik partiya a’zosi bo‘lgan Aktamov besh nomzod orasida 78,5% ovoz bilan deputatlikka saylangan.
Eslatib o‘tamiz, 2020-yilda “OKMK” bosh murabbiyi Mirjalol Qosimov Toshkent shahar kengashi deputatligiga saylangandi.
Harbiy dzyudochilar taqdirlandi
Fransiyaning Parij shahrida bo‘lib o‘tgan harbiylar o‘rtasidagi Jahon chempionatida sovrindor bo‘lgan o‘zbekistonlik dzyudochilar taqdirlandi.
O‘zbekiston Respublikasi Mudofaa vazirligi hamda mamlakat dzyudo federatsiyasi rahbariyati Fransiyadagi chempionatda umumjamoa hisobida birinchi o‘rinni egallagan O‘zbekiston terma jamoasi vakillari bilan uchrashdi va ularga esdalik sovg‘alarini taqdim etdi.
Eslatib o‘tamiz, o‘zbekistonlik dzyudochilar yakkalik bahslarda to‘rtta oltin, bitta bronza medaliga ega chiqqan bo‘lsa, jamoaviy bellashuvlarda bronza medalini qo‘lga kiritdi.
Jahon
Amerikalik bokschi oila a’zolari ko‘z o‘ngida o‘ldirib ketildi
Boks bo‘yicha og‘ir vazn toifasida harakat qiluvchi Denni Kelli (10-3-1, 9 KO) AQShda o‘ldirib ketildi. Bokschi oila a’zolari bilan avtomobilda ketayotgan vaqtda noma’lum kimsalar tomonidan otib ketilgan.
Politsiya ma’lumotlariga ko‘ra, bokschining mashinasi boshqa avtomobil tomonidan to‘xtatilgan va uning haydovchisi o‘q uzgan. Tibbiyot xodimlari sportchining jonini saqlab qololmagan.
Mashinada Kellining qaylig‘i va uch nafar farzandi bo‘lgan. Ularga jabr yetmagan.
Bokschi so‘nggi jangini 2019-yilning oktabr oyida o‘tkazgandi.
Pirlo Portugaliya grandini boshqarishi mumkin
“Yuventus” sobiq bosh murabbiyi Andrea Pirlo faoliyatini Portugaliyada davom ettirishi mumkin.
Calciomercato nashri xabariga ko‘ra, 42 yoshli mutaxassis “Benfika” qiziqish doirasiga tushgan.
Portugal klubi prezidenti Ruy Koshta bir qancha nomzodlar qatorida italiyalik mutaxassis variantini ham ko‘rib chiqmoqda. Qayd etish o‘rinli, Koshta va Pirlo bir vaqtlar “Milan”da birga to‘p surgan.
“Benfika” Chempionlar Ligasi 1/8 finaliga chiqqaniga qaramay amaldagi bosh murabbiy Xorxe Jezusning jamoadagi kelajagi noaniqligicha qolmoqda.
Ferran Toresning “Barselona” bilan 5 yillik shartnoma imzolaydi
Yarim himoyachi Ferran Torresning “Manchester Siti”dan “Barselona”ga o‘tishi yakunlanish arafasida.
Jurnalist Fabritsio Romanoning xabar berishicha, ispaniyalik futbolchi 27-dekabr kuni tibbiy ko‘rikdan o‘tadi va kelishuv imzolanadi. Torresning o‘zi agentlari bilan birgalikda Barselonaga uchib kelgan.
21 yoshli futbolchi “ko‘k-anorranglilar” bilan 5 yilga mo‘ljallangan shartnoma imzolaydi. Transfer summasi 55 million yevroni tashkil qiladi, shuningdek, yana 10 million yevro bonus ham ko‘zda tutilgan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)