Qoraqalpog‘iston, Samarqand va Namanganda giyohvand moddalarni mamlakat hududiga olib kirgan shaxslar qo‘lga olindi

Davlat xavfsizligi xizmati va Bojxona qo‘mitasining hududiy boshqarmalari tomonidan O‘zbekiston hududiga olib kirgan fuqarolar ushlandi.

DXXning Qoraqalpog‘iston boshqarmasi tomonidan o‘tkazilgan tadbirda Samarqand–Beruniy yo‘nalishida harakatlanayotgan Cobalt Xorazm viloyati “Sarmoy” yo‘l-patrul xizmati maskanida to‘xtatilib ko‘zdan kechirildi.

Natijada unda yo‘lovchi sifatida ketayotgan muqaddam ikki marotaba sudlangan To‘rtko‘l tumanida yashovchi fuqaro (1981-yilda tug‘ilgan) yonida 1 kilogramm geroin giyohvand moddasi borligi aniqlanib, tegishli tartibda rasmiylashtirib olindi.

Ma’lum bo‘lishicha, mazkur giyohvand modda tojikistonlik narkokuryerlar tomonidan Samarqand viloyatining Urgut tumaniga kontrabanda orqali o‘tkazilgan.

DXXning Sirdaryo viloyati bo‘yicha boshqarmasi hamda viloyat bojxona boshqarmasi xodimlari tomonidan o‘tkazilgan tezkor tadbirda Xovos tumanida yashovchi ikki nafar fuqaro (2000- va 2002-yilda tug‘ilgan) o‘zbek-tojik davlat chegara hududida to‘xtatilib tekshirilgan.

Natijada ularning yonidan 1 kilogramm 815 gramm gashish giyohvand moddasi borligi aniqlanib, tegishli tartibda rasmiylashtirildi.

Aniqlanishicha, ular qo‘shni davlat hududiga noqonuniy o‘tib, tojikistonlik tanishlaridan narkotik moddalarni olib, O‘zbekistonga qaytgan.

Tezkor tadbir davom ettirilib, ushbu narkotiklarning buyurtmachisi muqaddam sudlangan shaxs (1985-yil tug‘ilgan) ham qo‘lga olindi.

DXXning Namangan viloyati bo‘yicha boshqarmasi xodimlarining viloyat bojxona boshqarmasi xodimlari bilan hamkorlikda o‘tkazilgan tezkor tadbirda Andijon–Namangan yo‘nalishida harakatlanib kelayotgan Uychi tumanida yashovchi fuqaro (1979-yilda tug‘ilgan) boshqaruvidagi Nexia rusumli avtomashina “Norin” YPX maskanida to‘xtatildi.

Avtomashina ko‘zdan kechirilganda uning salonida 942 gramm gashish giyohvand moddasi borligi aniqlanib, o‘rnatilgan tartibda olib qo‘yilgan. Aniqlanishicha, ushbu gashish moddasi qirg‘izistonlik narkokuryerlar tomonidan Andijon viloyatiga olib o‘tilgan.

Hozirda mazkur holatlar yuzasidan tegishli moddalar bilan jinoyat ishi qo‘zg‘atilgan.