Қорақалпоғистон, Самарқанд ва Наманганда гиёҳванд моддаларни мамлакат ҳудудига олиб кирган шахслар қўлга олинди

Давлат хавфсизлиги хизмати ва Божхона қўмитасининг ҳудудий бошқармалари томонидан Ўзбекистон ҳудудига олиб кирган фуқаролар ушланди.

ДХХнинг Қорақалпоғистон бошқармаси томонидан ўтказилган тадбирда Самарқанд–Беруний йўналишида ҳаракатланаётган Cobalt Хоразм вилояти «Сармой» йўл-патруль хизмати масканида тўхтатилиб кўздан кечирилди.

Натижада унда йўловчи сифатида кетаётган муқаддам икки маротаба судланган Тўрткўл туманида яшовчи фуқаро (1981 йилда туғилган) ёнида 1 килограмм героин гиёҳванд моддаси борлиги аниқланиб, тегишли тартибда расмийлаштириб олинди.

Маълум бўлишича, мазкур гиёҳванд модда тожикистонлик наркокурьерлар томонидан Самарқанд вилоятининг Ургут туманига контрабанда орқали ўтказилган.

ДХХнинг Сирдарё вилояти бўйича бошқармаси ҳамда вилоят божхона бошқармаси ходимлари томонидан ўтказилган тезкор тадбирда Ховос туманида яшовчи икки нафар фуқаро (2000- ва 2002 йилда туғилган) ўзбек-тожик давлат чегара ҳудудида тўхтатилиб текширилган.

Натижада уларнинг ёнидан 1 килограмм 815 грамм гашиш гиёҳванд моддаси борлиги аниқланиб, тегишли тартибда расмийлаштирилди.

Аниқланишича, улар қўшни давлат ҳудудига ноқонуний ўтиб, тожикистонлик танишларидан наркотик моддаларни олиб, Ўзбекистонга қайтган.

Тезкор тадбир давом эттирилиб, ушбу наркотикларнинг буюртмачиси муқаддам судланган шахс (1985 йил туғилган) ҳам қўлга олинди.

ДХХнинг Наманган вилояти бўйича бошқармаси ходимларининг вилоят божхона бошқармаси ходимлари билан ҳамкорликда ўтказилган тезкор тадбирда Андижон–Наманган йўналишида ҳаракатланиб келаётган Уйчи туманида яшовчи фуқаро (1979 йилда туғилган) бошқарувидаги Nexia русумли автомашина «Норин» ЙПХ масканида тўхтатилди.

Автомашина кўздан кечирилганда унинг салонида 942 грамм гашиш гиёҳванд моддаси борлиги аниқланиб, ўрнатилган тартибда олиб қўйилган. Аниқланишича, ушбу гашиш моддаси қирғизистонлик наркокурьерлар томонидан Андижон вилоятига олиб ўтилган.

Ҳозирда мазкур ҳолатлар юзасидан тегишли моддалар билан жиноят иши қўзғатилган.